EDITORYAL - Viva Pit Senyor!

Samtang karong adlawa kadaghanan sa katawhan sa tibuok nasud motutok sa telebisyon alang sa away ni Senador Manny “Pacman”Pacquiao ug Amerkanong challenger Adrien Broner, dinhi sa Sugbo magpunsisok ang mga tawo alang sa grandiyosong Sinulog Grand Parade 2019 tungod sa pista ni Senyor Sto. Niño.

Sama sa gihapon, dako ang paglaum sa mga Pilipino nga buntogon ni Pacquiao ang kutiban og baba nga si Broner nga mipakagamay sa Pambansang Kamao sa iyang mga pamahayag niining mga nanglabay nga mga buwan.

Samtang dinhi sa Sugbo, mahudyaka ang mga tawo dili lang para kang Pacquiao kondili para sa Balaang Bata.

Sama sa gipaabot, masaligon ang mga deboto nga malinawon ug hapsay ang maong selebrasyon sama sa nangaging mga katuigan. Kulbahinam ang maong sangka tungod kay uhaw si Broner sa dungog ug nangambisyon usab nga maparehas kasikat ni Pacquiao.

Apan lahi ra og tumong si Broner kay personal kini nga dungog ang iyang giapas, samtang si Pacquiao dungog sa Pilipinas ang iyang gipas-an tungod kay nilapas naman siya sa lebel ni Broner.

Samtang ang mga contingents nga mosalmot sa Sinulog Grand Parade ug sa showdown, panaad ug halad ngadto sa Balaang Bata ang ilang tumong. Pildi man o modaog, siguradong halad kini ug dili personal nga katuyoan.

Sa pikas bahin, angay sab magmatngon ang katawhan ilabi na ang kabataan pagsunod gyud sa mga patakaran sa seguridad ug alang sa kalinaw sa kalihokan.

Likayan ang mga gidili ug dili magmagahi aron walay problemang masugatan sama sa mga nahitabo sa nanglabay nga mga Sinulog nga diin aduna gyuy mga nangasakitan ug aduna say nangapriso tungod sa kasamok nga ilang nabuhat. Uwahi na ang pagmahay.

Kinahanglan sab nga mahimong responsable ang mga tawo sa paglabay sa ilang mga basura ug dili maghugawhugaw kay dili basurahan ang kadalanan mao nga adunay mga hustong lugar diin ilabay ang mga basura.

Gikan dinhi sa Banat News, Viva Pit Senyor !