Pagsungasong sa mga bagyo
Di ni unang higayon nga gihulga og bagyo ang Piyesta Senyor sa Sugbo.
Labaw na nga di ni unang higayon nga gihulga og kusog nga bunok sa uwan ang nagkalainlaing kalihokan nga relihiyoso ug kulturanhon.
Gani, dihay katuigan nga gibahaan gyud gani ang kadalanan nga gisubay sa solemne nga prosesyon sa bisperas ug sa parada sa Sinulog sa adlaw sa piyesta.
Apan kanunay nga nipatigbabaw si Senyor Sto. Nino. Wa mabungkag bisan nangaligo sa uwan ang dancing contingents.
Labaw nang wa molunga pagbaha sa Basilica Minore del Sto. Niño ang minilyon ka deboto.
* * *
Di sab ni unang higayon nga gihulga nga makanselar ang fluvial procession.
Dihay tuig nga sa bisperas sa prosesyon sa kadagatan nidagko pag-ayo ang bawod nga nipasidaan ang PAGASA ug Philippine Coast Guard nga di luwas ang pagpugos sa tinuig nga kalihokan.
Apan dayon nilang hukom sa pagkanselar sa fluvial procession, nikalit lang paglinaw, mora nang lana ang kakalma sa dagat.
Bisan si Oscar Tabada, ang kanhi direktor sa PAGASA sa Kabisay-an nikumpisal nga way laing katin-awan gawas sa gahom ni Sr. Sto. Niño labaw sa kinaiyahan.
* * *
Dihay kausa nga niubog ko sa baha sa Colon ug downtown area samtang nangita og kasakyan pauli kay nahuman nang akong turno sa live coverage sa ABS-CBN sa Cebu City Sports Center. Kadungan nako ang ubang nitahan na sab sa kangil-ad sa panahon.
Nanlipaghong hinuon mi sa kauwaw kay nakasugat sa mas dakong bul-og sa katawhan nga mahinamon nga nagpaingon sa Basilica Minore del Sto. Niño ug sa Cebu City Sports Center aron makasalmot sa kapiyestahan bisan sa tanang kakulian.
* * *
Bisan retirado na, gipahibawo ko ni Tabada sa banabana sa PAGASA sa kahigayonan sa uwan sa mosunod nga duha ka adlaw:
Karong adlawa, Enero 19, Sabado, 80% ang kahigayonan sa uwan; samtang ugma, Enero 20, Domingo, 100% ang kahigayonan sa uwan.
May pasiuna hinuon nga timaan nga mahimong di mahinayon ang mga pasidaan sa PAGASA sa umaabot nga bagyong Amang:
Human nibanabana nga mahimong mosud ang bagyo sa Biyernes sa hapon o Sabado sa buntag, karon niingon nang PAGASA nga si Amang mahimong mosud sa Sabado sa gabii o sa Domingo sa buntag.
* * *
- Latest
