EDITORYAL - Laing hulga sa Pilipinas
(Banat) - January 18, 2019 - 12:00am

Nideklarar na og bankruptcy ang kinadak-ang shipbuilding yard dinhi sa nasud nga nahimutang sa kanhi US Naval Base sa Subic, Zambalez nga gipanag-iya sa kompanyang Hanjin sa South Korea.

Apektado ang gibanabanang kapin 10 mil ka mga empleyado sa pagpanira niini human nalubong sa utang nga $412 milyones dolyares sa mga bangko dinhi sa Pilipinas ug $900 milyones sa South Korean tigpautang.

Apan adunay interesadong mga kompanya gikan sa Japan ug Singapore ug labaw sa tanan, duha ka dagkong kompanya sa China ang mipadayag nga gustong maoy mopalit niini. Ang gobiyerno mipadayag og interes nga paliton ang pipila ka parte sa maong kompanya alang sa modernisasyon sa Philippine Navy.

Kun ang makapalit niini mga kompanya gikan sa Japan, Singapore o bisan ang Philippine Navy uban sa kompanyang iya sa Pilipino maluwas gyud ang mga nawagtangan og trabaho.

Apan dili gyud kini angay mapunta sa mga kompanyang iya sa China sanglit “vital installation” kini sa Pilipinas tungod kay diha na karon nagbase ang mga dagkong barko sa Philippine Navy.

Ang lokasyon niini nag-atubang sa West Philippine Sea diin makaresponde dayon ang pwersa sa Pilipinas pagsuporta sa Pagasa island.

Kun ibaligya kini ngadto sa China, makalahos-lahos nalang sila gikan sa ilang mga artipisyal nga isla sa WPS pinaagi sa pagpakaaron-ingnong magpaayo sa ilang mga barko. Kinsa may mobabag kun magdala sila diha sa shipyard og mga Chinese workers (o bisan mga sundalong Chinese) nga way pananghid sa Pilipinas?

Mahimo sab kaayong gamiton ang maong shipyard nga intelligence base sa China aron mangispiya sa Pilipinas ug sa mga kaalyado niining mga nasud nga magsige og anhi alang sa military exercise kauban sa Armed Forces of the Philippines.

Angay gyud ikonsiderar ang kabalaka sa AFP aron di mapunta ang Hanjin ngadto sa Chinese firms kay lisod nang mauwahi ang tanan sama sa sitwasyon karon sa WPS nga lisud nang mausab.

PILIPINAS
Philstar
  • Latest
Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

SIGN IN
or sign in with