EDITORYAL - Papel sa COA

Gisaway nasab ni Pres. Duterte ang Commission on Audit ug gani iyaha pa kining gipakapinan og dili maayong paminawon nga komento sama sa kidnapon ug i- torture ang mga state auditors.

Ang tigpamaba sa palasyo, Salvador Panelo mipasabot nga komedya lang kadto.Batasan na ni Duterte nga sawayon atubangan sa publiko ang mga ahensya sa gobiyerno nga sa iyang tan-aw mosungag sa iyang mga gusto.

Nahitabo kini sa Commission on Human Rights kinsa nagsige og pasidaan kabahin sa mga kaso sa extra-judicial killings ug ang dugoong war on drugs sa pangulo.

Si Duterte namahayag atol sa usa ka pakigpulong didto sa kaulohan nga maayong sampolan ang taga COA, pinaagi sa pagdagit og usa sa ilang mga sakop ug i-torture.

Isip presidente sa nasud dili kini maayong paminawon tinud-anay man o komedya.

Nagyawyaw si Duterte batok sa COA tungod sa matud pa pagsige og panghilabot sa mga proyekto sa gobiyerno nga gusto gyud ipasunod ang mga probisyon sa balaud matag mogasto ang gobiyerno.

Dili ba si Duterte nisaad nga iyang putlon ang kurapsyon sa gobiyerno? Daghan man gani opisyales (kasagaran iyang appointtees) ang iyang gipangtangtang. 

Apan walay bisan usa nila ang nakasuhan og administratiba o nabalita nga niuli sa kwartang gikawkaw.

Ang COA mao ang tigbantay sa gobiyerno. Kun dili gusto sa pangulo nga manghilabot ang maong ahensya mas maayong paulagan nalang ang mga patakaran haom sa iyang gusto.

Apan kun mao kini ang buhaton, maayo pang wagtangon nalang ang COA aron makapatuyang ang mga kurakot pagpakadato.

Kun buot hunahunaon ang COA mao unta ang kaabag ni Duterte kontra kurapsyon.

Ang COA gimugna aron pagsigurong di makapangawkaw ang mga kurakot nga opisyales, apan subo lang nga bisan sa kahigpit sa ilang mga patakaran makamaneho pa gihapon ang uban pinaagi sa pagbawog-bawog sa balaod.