Hugaw sa hospital gilabay sa dagat

Unang nag viral sa social media ang hulagway sa mga hospital waste o hugaw gikan sa tambalanan nga naglutaw sa kadagatan sa Barangay Ibo sa Dakbayan sa Lapu-Lapu.

Nakaani kini og pagtagad sa mga netizens hangtod naabot sa mga hingtungdan lakip na ang lokal nga kagamhanan sa Dakbayan sa Lapu-Lapu ug mismo sa pribadong hospital nga posibleng gigikanan sa maong mga hospital waste.

Hinoon in fairness sa Lapu-Lapu City wala maggikan sa ilang dapit ang naasoy’ng mga hugaw tungod kay base sa dokumento ug sa label sa mga hospital waste gikan kini sa Siyudad sa Sugbo ug naay gikan sa Mandaue City nga mga private hospitals nga nanag- iya sa mga hugaw.

Posibleng napadpad o naanod lang sa balod ang naasoy’ng mga hospital waste.  Nipahigayon na og pakisusi ang city government sa Lapu-Lapu sanglit ang ilang kadagatan man ang naapektahan niini.

Peligro kaayo kini sa panglawas sa mga tawo nga ma expose sa mga infectious hospital waste nga naglakip sa mga syringes, mga tubes nga naa pay sulod nga dugo ug uban pa.

Ang private hospital nga nalambigit mipagawas og statement sa social media mipadayag nga gipatawag na nila ang kompaniya nga gi outsource nila sa paghipos sa mga hugaw sa ilang tambalanan.

Basin dugay na kining gihimo ug karon lang nabisto kay nilutaw man sa dagat.   Mas maayong tinud-on sa paggukod dili lang sa LGU kondili apil na siguro sa ubang mga concerned government agencies ang paggukod og pagsilot sa responsable sa pagkatag niining mga hospital waste.

In fairness, ang LGU sa Lapu-Lapu regular ang ilang coastal cleanup apan mao lagi nga mag-usik lang sila sa ilang resources kun ang mga silingang syudad walay pagpakabana sa mga basura nga ianod sa dagat ug ipadpad padung Mactan.