Instant Messages Insulto!

Dili lang noodles ug kape ang instant karon kun dili halos na seguro tanan instant apil na ang pagtimbaya o greetings sa mga tawo nga suod sa atong kinabuhi.

Niadtong nakalabay’ng Pasko ug Bag-ong Tuig nagbaha ang mga mensahe pagtimbaya sa akong facebook ug messenger.

Sa Facebook halos man gi-type ang greetings gikan sa akong mga Fb friends nga para nako sinsero kay nag- effort man sa pagpindot sa keypad aron maka-greet og Merry Christmas ug Happy New Year.

Apan sa akong Messenger halos mga instant messages o kanang gitawag nga GIF ang akong nadawat, prepared greetings nga maisip nga kinopya lang kay inig pindot lang otomatik naa na ang mensahe.

Nindot man tan-awon kay naa may mga desinyo, apan para nako wala gyud ko makauyon sa ingon niini nga estilo sa greetings.

Una, dili gikan mismo sa kasingkasing sa nag greet ang mensahe kay pinindot ra man o kinopya gikan sa messenger.

Ikaduha compliance lang, basta lang gud maka-greet og wala nay personal attachment gikan sa nag- greet. Pasensya na sa naigo pero para nako dili sensiro ang ingon niini nga pagtimbaya maong wala gyud ko mo-reply sa nag-send nako og ingon niini nga greetings.

Insulto para nako ang ingon niini nga pagtimbaya busa mas maayo nalang nga dili ko makadawat ug greeting nga GIF message kay malain ko, seguro nagsubay pa ko sa kinaraan nga estilo.

Usa pa nga akong dili ganahan kanang motimbaya bisan isulat pa pero dili iapil ang ngalan, sama sa “HBD, HAPPY BIRTHDAY, MERRY XMAS...etc” naa man intawon kitay pangalan palihog isulat intawon kay ang ngalan ang labing importante kay mao kini ang nagpaila nga kita binunyagan.

Busa kon kapoyan man kamo sa pagtimbaya nga magkinahanglan nga mag-effort aw, ayaw nalang.

Sa pagsulbong sa teknolohiya nga ang tanan ipaagi sa dinali dali, ako dili acceptable nga iapil ang personal greetings sa gitawag nga “instant” kay kini ang kinoptanan sa panaghigalaay.