Padre Damaso!

Laing kontrobersya na usab ang giatubang sa Simbahang Katoliko diin usa ka pari ang gireklamo nga nagpasipala sa usa ka menor de edad sa Dakbayan sa Mandaue.

Tungod lang kay wala mapakaon ang iro iya na kunong gidagmalan ang dalagita kinsa anak ra usab sa iyang kusinera.

Sumala sa mga molupyo sa naasoyng dapit nga haduol sa simbahan kahunay na kuno kini mahitabo.

Ang nakapait kay ang menor de edad adunay kakulian sa panglawas kinsa naay learning disability ug kimay usab ang kamot niini.

Napriso ang pari tungod sa iyang gibuhat apan nagdumili kini sa pagtubag sa pasangil hangtod kuno masang-at ang kaso.

Ang biktima desidido nga ipadayon ang kaso .Siguro dili ikalimod nga nakatabang ang pari sa pamilya sa bata kay mao man kini ang naghatag kanila sa ilang panginahanglan.

Apan kun tinuod man ugaling ang reklamo, dili usab maayo nga dagmalan ang mga tawo nga iyang gibuhi.

Sa paningkamot karon sa simbahan nga mahaduol sa katawhan, ang isyu nga sama niini ang usa sa mga hinungdan nga makapabugnaw sa pagtoo sa uban.

Ilabi na karon nga puntarya sa Duterte administration ang simbahan sa iyang pag pangatake, diin aduna usay basehan kasagaran.

Sakit angkonon apan maoy kamatuoran nga daghan pa gyud ang gitawag nga mga Padre Damaso sa simbahan.

Hinoon mipahigayon na og imbestigasyon ang kadagkoan sa simbahan kalabot niini.

Maayo pa si Arsobispo sa Sugbo Jose Palma ang nangayo og pasaylo sa nahitabo bisan pa man og wa pa masuta kun sad-an ang pari.

Apan ang paring hingtungdan wala man mangayo og pasaylo bisan ngadto nalang sa biktima.

Hain naman ang kasing kasing nga puno sa kaaghop kun ipatigbabaw ang kaligutgot nga mosangpot na hinuon sa pagbakyaw sa kamot.

Hinaut unta nga mogawas ang kamatuoran sa nahitabo og mahatagan og hustisya ang hingtungan.

Kun ugaling nakasala ang pari aw angayan silotan, apan kun masuta nga dili tinuod ang pasangil mas angayan nga malimpyohan ang iyang ngalan.