Unya, bag-ong tuig na man pud!

Gumikan sa kadaghan nang lingaw sa tawo, maora’g nipaspas pag-ayo ang hagtik sa taknaan, ug daling misubang ug kalit mosawop ang adlaw. Mao nga makaingon kita nga bag-o pa gani kitang nagsaulog sa 2018 nga bag-ong tuig, karon, all of a sudden, mikilab ang Pasko, ug ania na usab kita sa lain nga tuig.

Most probably, daghan kanato ang molingi sa 2018, unsa ang nahimo niini nganhi kanato, ug molantaw sa unahan unsa ang idalit nganha kanato ang 2019.

Ato kining i-personal nga assessment. Let’s look at ourselves. Di kinahanglan atong susihon naunsa ang kalibutan ug ang nasud sa miaging tuig. Kundili, nausa kita sa miaging tuig. Ingonman, atong itugyan ngadto sa uban ang pag-aninaw kon unsay mahitabo sa kalibutan ug sa atong nasud karong tuiga. Usahay gud malingaw kita pag-ayo sa pagpakabana sa kahimtang sa atong palibut lakip na sila didto sa America, Europe, China, Russia, Saudi Arabia, ug sa ubang kanasuran, nga makalimot kita ug atong mataligam-an ang personal natong kahimtang.

Busa, lain na pud nga bag-ong tuig, komusta ka man?

* * *

Dili ni pagdayeg sa pamilyang Marcos kay daghan pa ra ba ang nasuko kanila, apan aniay puntos si Imee Marcos, nga kon sagupon kini sa Department of Transportation (DOTr) ug sa Land Transportation Franchising & Regulatory Board (LTFRB), libohan ka PUJ driver ug mga operator ang makaginhawa intawon og luag inig fully implement na sa PUJ modernization program sa kagamhanan.

Matud ni Marcos: Help make PUV modernization easy for operators. Nga di intawon magkalisud-lisod ang mga driver ug mga operator inigpatuman na sa hingpit sa pagpa-moderno sa depasaherong publiko nga mga jeepney.

Gisugyot ni Imee nga inay ilabay o ipatimbang na lang ang karaan nga mga PUJ, i-trade-in kini ngadto sa gobyerno suklian og cash agig hinabang o subsidy ngadto sa ma-displaced nga mga driver ug sa mga operator nga mawad-an na sa patigayon. Nindot nga sugyot bisan tuod og gikan sa usa ka Marcos.

Karon, samtang naghuwat sa hingpit pag-phase out sa mga jeepney, nagsalimuang intawon ang  maapiktohan nga mga driver ug operator.

Giingon nga hatagan og priority ang mga transport cooperative, apan kutob lang ni sa sulti tungod kay niining initial nga pagpadagan sa mga modernong  jeepney dinhi sa ato, usa man ka corporation ang nag-operate.

Busa, padaplin ang mga pobreng operator.  Nahibawo ba kaha si Presidente Duterte niini?