Kinabuwagan sa tuig
Disyembre 31, 2018 karong adlawa. Adlaw nga mapuno ang mga malls sa mga customer nga mangompra’g mga lingin nga prutas, sagad paabton og 12 ka klase, isulod sa fruit tray ug iplastar sa talad-kan-anan agi’g preparasyon pagsugat sa Bag-ong Tuig 2019.
Hasta kolor sa prutas pilion, kinahanglang pula o green gyud ang paliton. Kay kuno ang green nagkahulogag dolyares (green money) samtang ang pula, good luck.
Hinungdan, nga bisa’g mokalit la’g kamahal ang bili sa mga linging prutas niining adlawa, kuninitan lang gihapon.
Higala nakong Insek akong gipangutana nganong linging prutas man gyuy pilion?
Matud niya, nga ang lingin nagsimbolo sa kuwarta ug pabuwenas.
Gani, kun sila mangasawa, pilion man nila ang babaye kang kansang panagway lingin.
Mao diay, nga ang shape sa nawong sa iyang misis, moon face. Mura gyu’g takdol nga bulan!
Mipuno pa siya’g pahayag, nga kinahanglang 12 gyud ka klase sa prutas ang tapokon sa talad-kan-anan aron kada bulan abunda pirme sa grasya.
Kay kuno, ang 12 napresentar sa matag bulan sa usa ka tuig. At least, di gyud magutman!
Dili kay mga prutas ray kusog halin niining adlawa. Ultimong buwad, ginamos sa kamerkadohan, o uban pang matang sa pagkaon nga lutoonon o luto na daan, gipunsisokan sa mga mamalitay.
Ang mga grocery stores morag gi-tsunami. Nangahapay ang mga gipangtinda, pero lipay kaayo ang mga tag-iya.
Kay haskang dakoa sa ilang ganansiya!
Kadtong akong anhing Nanay Totang, naninda man sab tawon to’g ginamos, malipay gyud siya ini’g abot niining adlawa.
Ngano? Kay ang mga tawo mura kuno’g panon sa mga hulmigas nga modugok sa iyang tindahan, dinaghan ang paliton, dili na tinagidyot ang ipatakos, kondili, sinawpan ug ginarapon na.
Basta, ang upat ka tarong ginamos ni Nanay, gikulang pa!
Matud niya, kinabuwagan man gud sa tuig, Dodong.
Busa, motingob gyu’g palit ang mga tawo kay ugma, pag-abot sa Bag-ong Tuig, bisag usa ka sentimo, dili na mogasto. Kay magpalihi!
Kaanindot unta, kun ning kinabuwagan sa tuig 2018, magpalihi sab ta pagbiya sa tanang tang sala nga maoy nakapahilayo nato sa Ginoo ug sugdan tag patik ang malinis pahina sa Bag-ong Tuig 2019, sa mga apostolikanhon tang mga buhat nga makapahalangit!
- Latest
