Lumalabay lang

Kataposang adlaw karon sa tuig 2018 diin sugaton na usab nato ang bag-ong tuig 2019.

Bag-ong tuig bag-ong panid sa atong kinabuhi apan sa dili pa nato paklion ang bag-ong chapter sa atong kinabuhi lingion una nato ang mga panghitabo sa tuig nga ato nang biyaan.

Kapakyasan ug kalamposan ang atong naagian ug nasaksihan sulod niining tuiga.

Bisan og puno sa hagit ang atong kinabuhi apan giatubang nato kini hangtod nga atong nalatas diin hatod na kini mosangko sa pangpang sa laing katuigan.

Walay permanente niining kalibutana ang tanan lumalabay lamang, gustohon man nato ug sa dili ang tanan atong talikdan matud pa sa usa ka kanta.

Bitaw tinuod baya kini, apan sa atong pagtalikod aduna ba kitay nakat-onan nga mahimo natong balonon sa padayon natong pagbugtaw sa atong kapalaran?

Apan aduna gyuy uban nga mouban ra gyud sa sulog sa panahon walay paglantaw sa umaabot tungod kay wala man siya makakat-on sa leksyon sa iyang kagahapon.

Sama nalang sa sitwasyon sa mga tawo nga mahilig mogamit og pabuto sa pagsugat sa Bag-ong Tuig.

Kaniadto ra sila nasayod sa kapeligro nga mamugna niini apan nganong duna man gihapoy mangabiktima sa pabuto?

Kini tungod kay ang karon ra man ang ilang gitan aw, walay pakialam sa mga panghitabo sa umaabot bisan pa man og mangapungkol o mabuta ang ilang mga mata tungod sa mga pabuto hala bira gihapon.

Unta dili lang kutob sa karon ang panghunahuna sa mga tawo kondili tan-awon usab niini ang panghitabo nga magsiguro sa mahayag nga ugma sa tuig 2019.

Malipayong Bag-ong tuig natong tanan!