Panghinaut sa trapik

Pasko na usab ug maghinaut kita nga usa ka malipayon ug mabungahon ang atong mga paningkamot karong panahona. Ning adlaw sa pagkatawo sa atong manunubos, walay rason nga dili kita magmaya mahitungod sa gasa gikan sa kahitas-an.

Ug hinaut nga maayo usab ang dagan sa Metro Cebu karon. Sa nakalaby nga mga adlaw grabe ang ang trapik nga nasinati nato bisan asa dinhi sa metro.

Matag adlaw pulos reklamo kabahin sa trapik ang mibaha sa social media, ilabina sa Facebook.

Tukma na diay nga unya ka tuig human niadtong notoryos nga kahuot sa karsada didto sa south. Gikan sa South Coastal Road sa dakbayan sa iTalisay hangtud na sa lungsod sa Minglanilla smoabot sa dili momenos pito ka oras ang grabe nga trapik.

Ang hinungdan mao aduna kunoy nagbangga nga mga sakyanan sa highway sa Mingnilla. Apan ang nakaparat mao nga wala ni usa ka traffic enforcer nga miresponde sa maong insidente. Kining ang hinungdan sa grabe nga pag-ulbo sa katawhan.

Mao kadto ang usa sa labing grabe nga sitwasyon sa trapiko sa Metro Cebu. Ug hinaut nga nakakat-on na og leksiyon ang mga opisyal sa trapiko dinhi sa Metro Cebu. Hinuon, base sa obserbasyon sa tanan, nagkagrabe na gayud ang sitwasyon sa trapiko dinhi sa atong lugar.

Karong pagsaulog nato sa Pasko ug umaabot nga Bag-ong Tuig, ato lamang panghinauton nga masulbad na kining maong maldisyon sa mga Sugboanon. Hagbay ra kini nga mihasol kanato ug ambot kun kanus-a kini mahatagan og tukmang kasulbaran.

Ang problema mao ang kayagaw sa atong mga opisyal pagpangita og solusyon. Adunay laing pundok nga miduso og usa ka solusyon ug adunay nga moplastar usab og laing sistema. Mao nang nagkamuritsing karon ang kamada kay wala man magkasinabot.

Kini ang hinungdan ngano nga hangtud karon, walay modernong sistema sa mass transportation ang naimplementar dinhi sa Metro Cebu. Kun kanus-ka kaha kini matuman, agta ra siguroy nasayud. Kini ilabina nga padayon ang panagsungi niining atong mga opisyal.