Judge Azucena hero
JAV, BANATI! - Javier Y. Tapulado (Banat) - December 23, 2018 - 12:00am

Hagbay rang nabaniog sa tibuok kalibotan, nga ang timbangan sa balaod sa Pilipinas dili patas. Sama sa kahimtang sa kabos ug adunahan, dili gyud pareha ang ilang gibug-aton kun padaghanay man sa salapi nga nahuptan ang hisgotan.

Gani, ang mga pobre magpaulipon man sa dato aron makadawat og suhol nga mao intawoy ipalit nilag bugas mais, bulad ug ginamos alang sa pamahaw, paniudto ug panihapon sa nag-ilaid nilang pamilya.

Bisan sa korte, makapahibulong! Kay ang nakasalang dato man gyuy modaog, uy! Unya ang nagtinarong nga pobre, mao hinuoy pilde.

Kini maoy usa sa daghang hinungdan nganong daghang nagpabukid ug nagrebelde kay wala na makasabot sa laksot nga hitsura sa atong balaod. Unsaon, ingon sa walay luna ang pobreng linupigan batok sa milyonariyong nanglupig diha sa natad sa atong hukmanan. Labi nag polis ang kontra? Ay, sus!

 Na’ayyy, tan-awa ra nang mga timawang gipangtokhang-patay sa kapolisan? Sagad rason nila kay misukol kuno, mao nga ilang giunhan. Ang nakaporke, kay ang tagtungod nasayod nga walay dalang armas ug shabu ilang anak. Pero mahibulong, kay ini’g patik sa mantalaan, may plastik sa shabu na ug pistola duol sa nahimutangan sa biktima. 

Ug kapila na ba magbalikbalik kining senaryoha diha sa nagkadugong kadalanan?

Maayo gani, kay mga ginikanan niadtong gipatay’ng  Kian Loyd de los Santos, 17 anyos, gitumbok drug runner, may igong bala nga ikasugakod sa pagpakig-away atubangan sa husgado batok sa abusadong tulo ka polis, kinsa maoy mipatay sa bata.

Usab, sila gisuwerte kay nakatunong og ligdong huwes, Judge Rodolfo Azucena Jr., kinsa dili mahadlok og bala gikan sa kangitngit kay maoy gimahal ang pagtugkad sa kinailadmang bahin sa kamatuoran nga nakahatag niyag Diyosnong kahayag sa paghukom nga mao ang pagkombikto sa tulo ka polis nga namatud-ang sad-an.

Daghang dinaogdaog, taga Human Rights ug abogado nga nahigugma sa kaangayan ang misinggit og: “Dakong buhi ang balaod sa Pilipinas!”

Pagkadalaygon ning gihimo sa huwes. Siya ang nakabanhaw sa atong balaod nga gituohan sa kinabag-an nga hagbay rang namatay. 

Busa, alang nako, si Judge Azucena usa ka hero nga angay ipasigarbo sa tibuok kalibotan. Kay ang bati kanhi nga imahen sa atong mga hukmanan, karon iyang gipatahom.

 

AZUCENA HERO
Philstar
  • Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

SIGN IN
or sign in with