EDITORYAL - Tukmang pagtabang

Migahin og P15 milyones nga kwarta ang Cebu City government aron tabangan ang mga apektadong drayber sa Angkas ug mga drayber sa habal-habal nga rehistrado sa siyudad. Sumala pa sa report, dunay 6 mil ka mga drayber sa motorsiklo nga namasahero dinhi sa siyudad ug sila rehistrado sa dakbayan. Kini bisan pa man nga adunay balaod nga Republic Act No. 4136 o ang Land Transportation and Traffic Code.

Ang RA 4136 nag-ingon nga gidili paggamit ang mga motorsiklo pagpamasahero. Ning bag-ohay lamang ang Korte Suprema mimando nga pangdakpon ang mga Angkas nga nag-operate gihapon sa kadalanan.

Tungod kay ang RA 4136 nag-ingon man nga bawal ang mga motorsiklo gamiton nga pasaheroan kay gikonsiderar kini nga “pribadong sakyanan” way lalis, nagpasabot kini nga tanang mga motorsiklong pamasaheroan ilabi na ang mga habal-habal sa kabukiran ug sa siyudad otomatiko gyung dakpon.

Sa tan-aw sa mga kadagkoan sa siyudad sa Sugbo daghan gyud ang makulban og kaldero.

 Apan ang pangutana kun unsaon man paggamit kining P15 milyones nga pundo? Direkta ra ba kining ihatag ngadto sa tagsatagsa ka mga rehistradong mga drayber aron gamiton sa ilang inadlaw-adlaw nga panginahanglan samtang di pa sila makabiyahe?

Tukma ba gyud kini nga matang sa tabang ngadto kanila? Katalagman ba gyud kini? Maayo unta og wala kini kalabotan sa umaabot nga piniliay karong sunod tuig.

Kay adunay mas maayo ug malungtarong solusyon para niini, nganong dili nalang nila awhagon ang mga Sugboanong mga kongresista dili lang sa Cebu City kondili ang tanang mga magbabalaod gikan sa Sugbu ug kabisay-an aron mopasar og balaudnon aron amendahan ang RA 4136? Amendahan aron ipahaom sa panahon karon diin ang mga tawo mas gipili ang habal-habal o Angkas tungod sa grabeng traffic.

Kun mapasar ug maaprubahan, dili na kinahanglan pang mogahin og lain nasang P15 milyones ang Cebu City para sa mga drayber ug magamit pa unta kini aron itabang sa mga mas nagkinahanglan sama sa mga senior citizens ug persons with disabilities.