LRT, BRT angay lamang dalion

Magsugod na kuno og dagan ang light rail transit ug bus rapid transit sa kadalanan sa Sugbo duha ka tuig gikan karon.

Kini mao ang gipasalig ni Presidential Assistant for the Visayas Michael Lloyd Dino ngadto sa mga Sugboanon dili pa lamang dugay.

Ang LRT ug BRT kabahin sa Metro Cebu Integrated Intermodal Transport System (MCIITS) nga giduso karon ni Dino ug Department of Transportation isip usa sa mga solusyon sa nagkagrabe nga problema sa trapiko sa Metro Cebu.

Ang LRT magsugod gikan sa dakbayan sa Carcar ngadto sa dakbayan sa Danao. Mao kini ang magdala sa bandera sa MCIITS.

Samtang ang BRT anhi magdagan sa mga nag-unang karsada sa dakbayan sa Sugbo.

Apan daghan ang nagduda nga operational na sa BRT ug LRT sa 2020.

Lisod kuno kini nga tuohan gumikan lagi sa taas nga panahon nga igahin sa kagamhanan gikan sa feasibility study ngadto na sa actual construction sa maong project.

Matud pang Paul Villarete, ang administrador sa dakbayan sa Sugbo, nga dako iyang pagtuo nga dili gayud madayon paglarga sa LRT sa 2020.

Gani, iya kunong itaya ang iyang reputasyon isip engineer nga dili gayud mahuman ang maong proyekto sa maong tuig.

Usa sa rason nga iyang giisa mao nga wala pay feasibility study ang LRT. Madugay pa usab kuno ang pag-process niini sa National Economic Development Authority.

Kini wala pay labot sa ubang panginahanglan sama sa engineering design, civil works ug uban pa.

Hinuon, alang kanako, imbes nga magsige og pikhanay kining atong mga opisyales, mas labing maayo siguro nga maghugpong na lamang sila sa paningkamot nga madali ang implementasyon sa maong mga proyekto.

Hagbay ra nga mga nagtigi kining atong mga opsiyal kun unsay ikaayo ang sistema sa modernong tranportasyon sa Metro Cebu.

Ang uban dugay rang miduso sa BRT ug adunay mihandos usab karon sa LRT nga mas mao kunoy makasulbad sa problema sa trapiko dinhi.

Kay kun padayon ang ilang pikhanay, padayon usab ang maldisyon sa nagkadakong problema sa trapiko dinhi sa Metro Cebu.

Mao nang angay lamang nga magkahiusa kining atong mga opisyales aron nga matuman sa daling panahon kining maong mga proyekto.