Paburot sa plete sa habalhabal

Mokapin na sa usa ka bulan nga wala na ko magdala sa akong awto padulong ug pauli sa trabaho tungod sa grabeng ka huot sa trapiko.

Lapu-Lapu City man usab ang amoa busa dili gyud malikayan nga maagian nako ang trapik sa Mandaue hangtod na sa Cebu City diin nahimutang ang among opisina.

Maka-save ko og usa ka oras panahon sa tingpauli kon mag public ride ko ilabi na gyud kon habalhabal ang akong sakyan padung sa V-Hire terminal sa SM gikan sa opisina.

Makatulog tulog pa ko samtang nagsakay sa V-hire padung sa Lapu-Lapu.

Labaw sa tanan naka-save ko og dako sa gasolina nga ilimogmog ra kaniadto sa akong sakyanan tungod sa traffic.

Mao usab kini ang gibuhat karon sa uban nga adunay mga sakyanan mag public ride na kay naa man sad koy kaestorya nga pareho sad nako og sentimiyento.

Mas gipili nga habalhabal ang sakyan kay dali ra man nga makalusot lusot sa traffic, kay kun mag jeep hilabihan na ka puno ug masangit pud sa traffic.

Apan dunay mga habalhabal driver nga mapahimuslanon sa higayon mangayo og hilabihan ka mahal.

Gikan sa Lahug padung SM 100 pesos ang pangayo, kung hangyoon ilang paubsan sa 70 pesos.

Kon nagdali ka aw mapugos gyud sa pagsakay sa single nga motor.

Usa ka habalhabal driver akong gipangutana, 500 pesos ang kinagamyan niyang kita sulod lang sa pipila ka oras nga biyahe.

Unta dili lang pud palabian ang pagpahimulos sa sitwasyon kay luoy usab ang riding public.

Hinoon naay uban nga mosingil lang og barato apan pipila lang sila nga Diniyos ang pagpamasahero.