Ambulansiya sa dagat

Gitug-anan ko ni Dr. Paulus Cañete nga may mipadala kaniya og text message ug nagtanyag kaniya nga hatagan siya’g P3 milyones bugti sa dili na pagdayon pagdagan pagka Board Member sa ikaunom nga distrito. Si Cañete nga kauban namo sa media, kay siya man ang presidente sa Sugboanong mga Kumentaristang Nagpakabana (SUKNA), mi-reply sa sender nga siya lang ang mohatag og sama nga kantidad. Pila ba ang nagpapili karon sa pagka Board Member sa 6th district? Kay gitanyagan man si Dr. Paulus nga pasibogon, sa ato pa dunay miisip ni Dr. Paulus nga hulga sa ilang kandidatura. Mora’g may gidudahan ko, apan dili lang nako isulti.

Nindot bitaw gyud kon gikan sa media ang panerbisyo sa kagamhanan kay motrabaho gyud. Dinhi sa dakbayan sa Sugbo, kuhai og base si Konsehal Dave Tumulak. Unya, kadtong gipatay nga si Jojo dela Victoria nga dili gyud modawat og suborno mao nga gipatay.

Plano diay ni Dr. Paulus nga maninguha siya aron makatukod ang usa ka district hospital diha sa lungsod sa Cordova ug Consolacion, ingon man Sea Ambulance nga kasakyan sa mga pasyente gikan sa kaislahan paingon sa mainlaind sa Lapu-Lapu.

Natan-aw tingali sa iyang mga kaatbang ang kanindot sa plano ni Dr. Paulus kay sigurado man gyud nga hangpon kini sa katawhan, ug mao nga gitanyagan na lang siya nga pasibogon.

* * *

Gitataw ni kanhi Special Assistant to the President (SAP) Bong Go nga bisan og wala kay Identification Card (ID) sa Malasakit Program makapahimulos ka gihapon og medical assistance sa maong programa.

Gipangutana gyud nako niini si SAP Bong Go sa pag-anhi niya sa Cebu kaniadtong Sabado sa gabii kay daghan kaayo ang wala maisyuhi og ID sa Malasakit Program ni Presidente Duterte, ug nagtuo nga dili sila makapahimus sa mao nga medical program. Iyang gipasabot nga kadtong gustong mopahimus sa Malasakit Program moadto ra sa Vicente Sotto Memorial Medical Center kay dunay mga kawani sa Malasakit Program nga ilang gidangpan, ug maoy moasikaso sa ilang panginahanglan.

Hangtud sa P50 mil ang makuha nga benepisyo sa kada pasyente nga mo-avail sa Malasakit Program gikan sa mga tabang sa Philippine Charity Sweepstakes, Pagcor, DSWD, PhilHealth ug Department of Health. Kon ang usa ka pasyente magkinahanglan pa og dugang tabang, aw dinhing bahina, magkinahanglan na og approval gikan sa mga nagdumala sa programa.

Kaniadtong Sabado sa gabii, gihatagan ko og tulo ka ID sa Malasakit Program, pero dili pa sa ako, kondili sa ubang nanginahanglan.