EDITORYAL - Ouster plot napud?

Ang Pilipinas usa sa dunay labing aktibo pag-abot sa hisgutanan sa politika. Dinhi makita ang mga nanggungis na sa politika nga parehong nakatabang sa paglambo ug nakatampo sab sa kaalautan sa katawhan.

Dili na bag-o kining mga balita nga dunay mga planong palagputon ang matag adunay bag-ong molingkod nga administrasyon. Halos tanang presidente sa Pilipinas kanunay nga dunay hulga sama niini.

Si Duterte tungatunga niining tuiga miingon nga dunay “Red October” nga plano aron siya tangtangon sa pwesto apan Disyembre nalang wala kini mahitabo.

Karong bag-o, ang anak ni Pres. Duterte nga si kanhi Davao City Bise Mayor Paulo Duterte giingong mi-post sa social media og screenshot sa matud pa excel file nga nagpakita sa lista sa mga nagplano og ouster movement batok sa iyang amahan.

Dunay nisaway ug duna say niuyon samtang dunay uban nga hait og paminsar ang nakakwestyon kun unsa kini ka tinuod ug kun beripikado ba gyud ang mga naa sa listahan nga giingong “United Opposition” ug nakig-alyansa sab sa mga walhon ug mga “mutant/cause-oriented groups” ug mga giingong Obispo.

Pipila sa mga gipanganlan ang hagbay rang nangamatay ug duna say uban nga paralisado na ug dili na gani makabarog. Apil sa naa sa listahan, hugot pa gyud nga supporter ni Duterte nga si Carmen Pedrosa kinsa usa ka kolumnista sa The Philippine Star ug direktor karon sa Philippine Amusements and Gaming Corp.

Mga pribadong kompanya, sakop sa media, mga sakop sa Liberal Party, civil society groups ug hasta si “Jollibee”apil sa nagplano?

Maayo unta og masuportahan kini ni Paulo ug mapamatud-ang tinuod ang iyang gipatik nga kadiyot ra sab kaayo sa net kay iyaha ra pud dayong gi-delete.

Tungod kay kining iyang gibuhat makapasamot og kawatak-watak sa mga tawo nga gusto tapukon sa iyang amahan aron moabante ang nasud.