Buaya sa Social Media

Aniay usa ka inahan na nakugang ug dili makatoo sa gihimo sa iyang 13 anyos nga anak babaye.

Sa sayo ug linghod nga panginadaron nalambigit na sa pag pakighilawas dili lang pinaagi sa cyber technology kon dili sa linawas gyud.

Nagsugod ang tanan pinaagi sa social media diin dunay nakaila sa Facebook nga maoy iyang gika chat nga misangpot sa malaw-ay nga binuhatan.

Hangtod gihaylo ang biktima sa suspek nga magkita sila personal og didto nahitabo ang pag pakighilawas.

Ang bata dili na mosulod sa klase kay nahigam na sa gihimo sa suspek kaniya kay hatagan man pud kuno og kwarta.

Ang nakaparat kay gi-videohan man ang ilang gihimo sa kama nga maoy gigamit sa lalaki panghadlok sa bata aron makigkita kaniya pirme.

Dili na mosulod sa klase ang biktima labi na kun mo demand ang lalaki nga gamiton iyang lawas kay kun dili motunga ikatag ang video sa facebook.

Natribokar ang tanan dihang wala ma logout sa bata ang iyang facebook ug nabasahan sa inahan ang messenger diin atoa tanan ang conversation sa suspek.

Nangayo og tabang ang inahan sa mga otoridad hangtod nadakpan ang suspek.

Nasayran nga gusto na ibugaw sa suspek ang bata ngadto sa ubang mga lalaki nga nangita usab og mga menor de edad.

Pastilan, leksyon kini sa mga ginikanan nga pasagdan lang ang mga anak nga magumon sa social media.

Expose na kaayo sa social media ang mga bata, abi sa mga ginikanan nga kutob lang sa selfie ang mga anak apan dili kakompyansahan kay naay mga buaya sa social media nga motukob kanila.

Busa bantayan gyud kanunay sila sa higayon nga mogamit sa social media aron dili magmahay kay basin ulahi na ang tanan, nakaon na sila sa gutom sa unod nga mga tawo sa social media.