Misa De Gallo na diay hapit
JAV BANATI - Javier Yntig Tapulado (Banat) - December 7, 2018 - 12:00am

Kaniadto, ini’g entra pa lang sa unang adlaw sa Septiyembre, may estasyonan na sa radyo nga mopatukar sa kahanginan og I’ll Be Home for Christmas ini’g ka kaadlawon ug panahon sa magkalawom na ang kagabhion.

Mga panimalay, ultimong payag magsugod nag pamitay og mga parol sa bintana, manaod og mga kutay sa mga sugang series nga daw bangaw ang mga bulok,  mokidlapkidlap-sayaw  sa kangitngit nunot sa kadahonang mikiaykiay human hagki sa huyohoy nga gibuga sa malipayong ngabil sa kinaiyahan.

Pagkatahom sud-ongon sa mga dalan nga maagian. Nanaglaray ang mga paskohanong dayandayan nga puno sa kinabuhi. 

Apan karon, mingaw pa sa tirana ang kabalayan. Menus nag Christmas tree, series lights ug Belen nga makita sa kadalanan.

Nahanaw na ang katahom sa palibot kay wala na sininai og mga makalingaw’ng talan-awon sa Pasko sa mga pobreng pamilya, kinsa maoy gikulata pag-ayo sa grabeng pagtaas sa presyo sa tanang inadlaw’ng palitonon tungod sa walay kasingkasing nga excise tax imposition ning gobiyerno tang walay laing gihunahuna gawas sa pagsige’g himog balaod unsaon pagkolekta’g dugang buhis sa katawhan, kinsa hagbay rang nabun-og sa pagbinayranay.

Kadto lang pagkatawo sa 12% VAT, morag gituok ang liog ug gilaslasan ang bulsa sa mga konsumidor niadto. Nagkapusngapusnga intawon ang mga tawo, kinsa daw gilumsan sa paspas nga pagsaka sa bili sa tanang produkto.

Samot na, sa pagkahimugso sa excise tax ning panahon ni Tatay Digong. Kay hasta mga gasoline station, wala puy preno-preno.

Nagpatuyang sab! Hinuon, mimenus na ang presyo sa gasolina sa world market, monang mius-os sab ang presyo niini dinhi sa ato. 

Pero ang bugas, karne, de latang makaon ug uban pa, mibarato ba? Nagpabiling mahal! Kini ang hinungdan nganong diyotay rang balay ang nangadorno.

Kay ultimong parol, maglisod na silag palit! Para bugas na lang gyod ilang budget.

Luoya nato, sa? Ay, kamingaw sa payag! Mura gyu’g dili Disyembre.

Kay kon kaming Lector ug Cantor sa simbahan, wala pa tagaig schedule para Disyembre 16 ngadto sa 25, dili ta ko makapreparar nga Misa de Gallo na man diay hapit. 

Balig siyam ka  adlaw nga tagaan tag pinaskohan sa Ginoo. Kana kun modawat ka?  Manimba tang tanan, ha?

MISA DE GALLO
Philstar
  • Latest
Latest