Komedya
LINTUNGANAY - Fred Languido (Banat) - December 6, 2018 - 12:00am

Sa usa ka tigom atubangan sa mga membro sa ASEAN national organizing committee niadtong Lunes, gisaysay ni Presidente Rodrigo Duterte unsa ka daghan ang mga kalihukan nga kinahanglan niyang tambongan atol sa bag-o lang nahuman nga ASEAN Summit didto sa Singapore.

Matud niya nga labihan ka puno sa iyang schedule ug gihulagway niyang labihan gyud niini ka kapoy. Kini maoy hinungdan nga dunay mga tigom nga wala siya makatambong tungod kay kinahanglan siyang  motagpilaw.

Taliwala sa iyang pakigpulong, wala damha nga motug-an si Duterte nga migamit siya og marijuana aron kuno siya makasustinir sa pagtambong sa mga kalihukan tungod sa iyang pangidaron imposible niyang mahimo ang tanan.

Ang pamahayag sa presidente nakaukay sa nasud. Naiskandalo ang mga mabuot nga lungsoranon pwera sa iyang mga buta ug bungol nga mga dumadapig nga ang paboritong pasanginlan sa mga bulilyaso sa ilang idolo mao ang media.

Pipila ka oras human sa diskurso sa presidente, gisukna siya sa mga sakop sa media mahitungod sa iyang pag-angkon nga mihithit og marijuana. Ug sama sa gipaabot, gibakwi ni Duterte ang iyang pamahayag. Matud niya komedya ra ang iyang gihimo aron kuno pagpabuhi sa gihulagway niya nga labihan ka la-ay nga kalihukan.

Kun komedya man tinuod ang iyang  pamahayag, nganong gihuman niya ang iyang diskurso nga wala gyud paulii ang mga mitambong sa kalihukan?  Nganong iyang gipaabot nga sukiton siya sa media usa ipasabot nga tiaw ra ang iyang gipanulti?

Dili kaha naligas gyud ang dila sa presidente pag-angkon nga mogamit siya og marijuana? Ug tungod kay lisud nang bawi-on ang nabuhian nga mga pulong nagpalaban nalang sa kumedya nga maoy labing sayon nga palusot sa bulilyaso niyang pag-angkon?

Tinuod man o komedya ang iyang gisulti, dili ni makaayo kaniya ug sa gobyerno sa kinatibuk-an. Hinuon naghatag ni og kalibog kanus-a ta angayang motuo niya. Dili na kasiguro kanus-a nato angayang seryosohon ang gisulti sa presidente.

Matud ni Atty. Salvador Panelo, ang tigpamaba sa Malakanyang, katungod ni bisan kinsa, lakip na sa presidente, ang pagkomedya. Husto si Panelo apan dili na maoy isyu. Wala ta maglalis og mahimo ba o dili nga magkomedya si Duterte. Ang isyu mao komedya ba o dili ang pamahayag sa presidente.    

ASEAN RODRIGO DUTERTE
Philstar
  • Latest
Latest