Drugas ug korapsyon
AMBOT LANG - Gerry Auxilio (Banat) - December 6, 2018 - 12:00am

Ang hepe sa Guadalupe Police Station, Chief Inspector Dexter Basergo, mitug-an nga anaa sulod sa prisohan sa Sugbo ang financer sa mga nadakpan sa Sitio Tambis, Sambag 2 nga nakuhaan og mobalor sa P41.8 milyones nga gidili nga drugas nga shabu. Wala isulti ni Basergo asa nga prisohan sa Sugbo ang giingon niyang piniriso nga financer aron dili masunog ang padayon pa nilang operasyon.

Usa lang ang hinungdan nganong nakapadayon sa gidili niyang negosyo ang giingon ni Basergo nga financer bisan og anaa siya sulod sa prisohan ug kini walay lain — ang cellular phone.

Ang pangutana, giunsa man pagsulod sa cellular phone sa prisohan? Dili ba gidili man kining maong matang sa komunikasyon nga makasulod sa prisohan?

Ang cellular phone dili tungaw nga dili nimo hapit makit-an kun ipasulod sa prisohan. Sa matang sa pagrekisa nga gipatuman sa mga jail guards ug opisyal niadtong mga mobisita sa prisohan nga bisan ang kinatawo sa babaye nga mobisita buki-ki-on, imposible nga dili makita ang pagsulod sa cellular phone sa prisohan. Wala ‘tay lain nga mapasanginlan nga nagpasulod sa cellular phone sa prisohan gawas sa kurapsyon. Ang kurapsyon dugay na nga suliran sulod sa prisohan. Gisisihan na kining maong suliran gumikan sa iyang kakaraan pero wala gihapon masulbad. Ngano man? Unsa man ang hinungdan? Tungod ba kay ang kurapsyon nahimo nang kultura sa mga Pinoy?

Tungod sa kurapsyon milipang ang negosyo sa gidili nga drugas. Sumpay og tina-i si korapsyon ug gidili nga drugas. Busa kun buot man nga sulbaron sa gobyerno ang gidili nga drugas, gikinahanglan usab nga apilon niini ang kurapsyon.

Kun seryoso si Presidente Rodrigo Roa Duterte sa iyang kampanya batok sa ginadili nga drugas, gikinahanglan usab nga iyang seryosohon ang kurapsyon.

CORRUPTION
Philstar
  • Latest
Latest