Gustong ilisan ang iyang apelyido sa passport
LEGAL CORNER - Atty. Divine Flores Marcial (Banat) - December 5, 2018 - 12:00am

Dear Atty. Divine,

Usa ko ka OFW ug lima ka tuig nang nagtrabaho sa gawas.

Duna koy usa ka anak apan nagbuwag mi sa akong bana human nako siya nasakpan nga aduna siyay laing babaye ug gani naa siyay anak sa maong babaye.

Sakit kaayo iyang gibuhat nako attorney ug wa na gyuy chance nga magkabalik pa mi.

Naa nako ang among anak og kun mobalik ko sa gawas ang akong mama ang moatiman sa bata.

Ang ako lang pangutana kun pwede ba nako ilisan ang akong apelyido sa passport gikan sa apelyido sa akong bana ngadto na sa akong apelyido sa pagkadalaga? Daghang salamat.

Leona

* * *

Dear Leona,

Base sa Passport Act of the Philippines og sa Implementing Rules and Regulations niini, kini nagkanayon nga kon ang minyo nga babaye mogamit sa apelyido sa iyang bana sa iyang passport, dili na kini mamahimo niyang usbon gawas lang kun aduna siya’y mapakita  nga decree sa annulment of marriage or decree sa divorce nga gi recognized sa Philippine courts or kun makapakita siya og death certificate sa iyang bana.

Sa imo nga kaso, kun wa pa ma-annul ang inyong marriage dili gyud ka makausab sa imong apelyido sa passport kay kinahanglan ka og basihanan  sa pag-usab niini.

Hinuon ang atong balaod wa man magpugos sa minyo nga babaye sa paggamit sa apelyido sa iyang bana apan once imo na kining gigamit sa imong passport ug uban pang dokumento dili kana basta-basta nga makausab niini. Thanks and God bless.

Atty. Divine

* * *

Alang sa inyong pangutana, ipadala lang sa Legal Corner sa Banat News sa V. Gullas St., Cebu City or email sa flores_divina@yahoo.com ug akong tubagon ang inyong pangutana pinaagi sa akong column matag Miyerkules, Sabado ug Domingo.

PASSPORT
Philstar
  • Latest
Latest