Persona non-grata
LABTIK - Gerry Auxilio (Banat) - December 4, 2018 - 12:00am


Ipadeklarar sa mga aktibista dinhi sa Sugbo si Ilocos Norte Governor Imee Romualdez Marcos nga persona non grata atol sa ilang gipahigayon nga protesta dihang mibisita sa Sugbo niadtong miaging semana ang gobernadora nga magpapili sa pagka Senador ning umaabot nga eleksiyon.

Unsa ba ang persona non grata? Sigun sa Wikipedia, ang “persona non grata” usa ka latin nga pulong nga sa Eninglis pa “person not appreciated”.

Kining maong pulong gigamit sa diplomatikanhong relasyon sa kanasuran sa kalibotan ngadto sa usa ka langyaw nga ang pagsulod ug ang pagpabilin niini sa usa ka nasud gidili sa iyang gobiyerno.

Ang persona non grata gikonsiderar nga pinakaseryoso nga matang o porma sa censure nga mapahamtang sa usa ka nasud ngadto sa usa ka langyaw nga diplomat nga dili puyde nga dakpon ug taralon tungod kay gipanalipdan sa iyang diplomatic nga immunity.

Gawas sa diplomatikanhiong relasyon, ang buot ipasabot sa persona non grata: ang tawo gisalikway ug gikonsiderar nga walay labot.

Nagkalain-lain ang rason nganong ideklarar nga persona non grata ang usa ka tawo ug pipila niini, dili siya mahigalaon, nakalapas sa balaud ug sa pagpanaway sa pangulo sa usa ka nasud.

Tungod niini, ang persona non grata dili mahimong ipahamtang kang Ilocos Norte Governor Imee Romuladez Marcos kay wala man siya makalapas sa balaud sa Sugbo, wala siya manaway sa mga opisyal sa Sugbo ug labi na nga wala siya mahimong dili mahigalaon sa mga taga Sugbo.

Si Gobernador Imee R. Marcos adunay katungod nga mobisita sa Sugbo ug makighalobilo sa mga Sugboanon.

Ang mga aktibista nga nagprotesta kun imo nga tugkaron ang ilang motibo mao ang pa gamit lamang ni Marcos nga puhonan sa pagpasikat sa ilang grupo aron kini mailhan kay misalmot man sila sa party-list eleksiyon.

Ang pagpadeklarar nila ni Marcos nga persona non grata is a plain and simple media mileage aron mapaila ang ilang grupo.

IMEE ROMUALDEZ MARCOS
Philstar
  • Latest
Latest