ROTC

Lima ka mga tunghaan sa Sugbo ang gitan-aw sa Department of Education nga magsilbing “pilot schools” pagpatuman og balik sa mandatory nga Reserve Officers’ Training Corps (ROTC).

Kini naglakip sa Cebu City National Science High School, Abellana National School, Mambaling National Night High School, Bangkal National High School sa Lapu-Lapu, ug Mandaue City National Comprehensive High School.

Matud ni Dr. Juliet Jeruta, regional director sa DepEd-7, ang maong mga tunghaan mopatuman sa mandatory nga ROTC sa mga tinun-an sa senior high school.

Mag-agad sa resulta sa pagpatuman sa maong mga tunghaan ang desisyon unya himuon ba pagbalik nga mandatory sa tanang tunghaan ang ROTC.

Si Presidente Rodrigo Duterte maoy mimando nga himuon pagbalik nga mandatory ang ROTC aron matudloan og disiplina ang mga batan-on.

Apan gikinahanglan nga amendahan ang balaud nga naghimo niini nga optional.

Ang ROTC unang gipatuman dinhi sa Pilipinas niadtong 1912. Ang unang official ROTC unit natukod didto sa University of the Philippines. Wala magdugay nisunod sab ang mga pribadong tunghaan. Ang unang private school nga nagtukod og ROTC unit mao ang National University.

Si Presidente Manuel L. Quezon maoy naghimo sa ROTC program pinaagi sa National Defense Act of 1935 o Commonwealth Act No. 1 nga mandatory sa tanang tunghaan.

Ang ROTC program namatud-an nga epektibo ug maoy nagsilbing tinubdan sa militar sa iyang mga opisyal atol sa World War II.

Bisan hangtud karon 75 porsiyento sa mga opisyal sa militar gikan sa ROTC advanced course.

Nahunong ang mandatory program sa ROTC niadtong 2001 human mapasar ang Republic Act 9163 o ang National Service Training Program (NSTP).

Ubos sa maong balaud ang ROTC gihimong optional alang sa mga tinun-an.

Ang hinungdan mao ang kontrobersiya nga nahitabo didto sa University of Santo Tomas diin usa ka tinun-an ang gipatay human ibulgar ang anomaliya sa programa sa ilang tunghaan.

Si Mark Welson Chua napalgang patay didto sa Pasig River niadtong Marso 2001 human niya ibulgar ang pangurakot sa mga opisyal sa ROTC sa ilang tunghaan.

Ang maong insidente maoy nakausab sa dagan sa programa. Gisakyan sa mga politiko ug gihimong optional ang ROTC.