Ang balor sa trapik

Migrabe na gyud ang trapik. Dili man ni bag-o pero karon grabe na gyud kaayo. Bisan asa ka agi sugaton ka na og trapik. Usa sa gisugat og trapik sa iyang pagbisita sa Sugbo mao si Ilocos Norte Governor Imee Romualdez Marcos kinsa nalangay sa pagabot sa iyang press conference. Sulbara unya ang trapik Governor kun ma Senador na ka.

Tungod sa trapik hapit tanan nagreklamo ug nagbagutbot. Ang suliran sa trapik nakapaalkanse og binilyon ka pesos matag adlaw kun imong hatagan og presyo o balor ang imong oportunidad nga nawagtang.

Sigun sa pagtoon nga gihimo sa Japan International Cooperation Agency (JICA) moabot sa 3.5 bilyones ka pesos ang balor sa nawagtang nga oportunidad matag adlaw sa Metro Manila samtang moabot usab ngadto sa 1.1 bilyones ka pesos ang sa Metro Cebu.

Ingon ani ka dako ang balor sa suliran sa trapik. Ang nahisgotang kantidad gibase pa lamang kini sa nawagtang nga oportunidad wala pa kini labot sa nagasto sa gobiyerno sa pagpamalit og mga kahimanan nga gigamit sa pagpatunhay sa trapik ug sa suhulan sa mga tawo nga nagpadagan niini.

Unsa man ang hinungdan sa trapik ug nganong nagkagrabe man kining maong suliran dili lamang sa Metro Manila ug Metro Cebu kun dili apil na sa tibuok nasud?

Si Atty. Josephus B. Jimenez sa iyang artikulo nga What Matters Most mihatag og tulo ka rason nganong adunay suliran sa trapik ug kini mao ang wala makontrolar nga pagdaghan sa mga sakyanan, kapakyas sa pagdumala sa limitadong espacio sa dalan ug ang kapakyas sa pagdumala sa oras.

Busa ang sulbad sa suliran wala nay pautangon og sakyanan ug cash ang pagbaligya kay gamay ra man ang makapalit kon cash.

Dili magbutang og pay parking zone sa mga dalan ug dili padunganon og sulod sa klase ug trabaho ang mga tinunan ug kawani.

Walay plano si Imee Marcos nga magpalabang og balaudnon bahin ani kon ugaling siya ma-senador?