Serbisyo sa LTO langay

Kon daghan ang sakyanan, mas daghan pa ang drayber nga molukat og driver’s license sa Land Transportation Office (LTO). Liboan gayud ang mokuha o mopabag-o sa ilang lesinsiya kada adlaw – usa ka dakong hagit ngadto sa LTO pagpangita’g maayong paagi unsaon paghatag sa nanginahanglan og makatagbaw’ng serbisyo.

In fairness, naningkamot baya ang LTO. Upat ka dagkong establisamento ang gibutangan nila’g opisina: Tulo ang sangang buhatan nga anaa sa:  Robinson Department Store-Fuente Osmeña, Robinson Galleria ug SM City Mall. 

Samtang ang usa (gikonsiderar main-office for processing and releasing) mao ang SM City Seaside.

Sa naasoy’ng tulo ka LTO branches, ang renewal for old drivers licenses ray ilang dawaton, diin mao kini ang maagian sa matag aplikante: Step 1) Medical exam. Step 2) LTO evaluator. Step 3) Photo and Digital signature ug Step 4) Cashier.

Huma’g bayad, moisyu ang LTO og Official Receipt (OR) ilis sa imong daang lisensiyang plastik.

Pero ang releasing sa plastic license ID adto ipakuha sa SM City Seaside after one week or more.

Nagtuo ang nakalukat nag OR nga ini’g abot nila didto, makuha na dayon ang plastic license. Apan gipapil-ap gihapon sila’g personal information data sheet.

Ug miusab pag-agi sa  Step 3) Photo and Digital signature nga unta humana man sila niini.

Daghang aplikante ang nahayblad. Kay ang meaning sa releasing, releasing gyud unta. Nungkang apila’g processing nga maoy nakapadugayg samot sa paghinuwat?

LTO Officers, niay mahigalaong sugyot gikan sa concerned citizens unsaon paghilot ning maong kalangay.

Hain kahay maayo’g butangan ninyo’g interlink connection ang tanang LTO branches paingon ngadto sa LTO Releasing-SM City Seaside aron malikayan ang duplication of same procedure (Step 3)?

At least, pag-abot nila didto, igo na lang sila pagkuha sa naandam nang bag-ong lisensiya?

Ikaduhang sugyot. Mas nindot nga matag  LTO Branch, naa na didto tanang kahimanan – gikan sa Medical exam hangtod na sa releasing.

 Ayaw ibulag ang processing ug releasing kay purihisyo kaayo kini labi ning panahon nga atong kadalanan puwerte nang trapika, diin ang biyaheng normal nga 15 minutos ra unta, mahimo nang usa ka oras.

LTO Sirs ug Ma’ams, intawon kaloy-i kami. Speed up the plastic licenses releasing please.