Kausaban sa mga Sugboanon

Sa edisyon kaniadtong Domingo, nagbandera sa front page sa The Freeman, ang igsuong pamantalaan sa Banat News, ang estorya mahitungod sa dakong kausaban sa Sugbo sa nanglabay nga mga dekada.

Matud pa sa maong report, kaniadto nag-una ang Sugbo sa mga lugar sa nasud nga grabe nga makababag sa national government.

Apan karon, morag nausab na ang hapak sa hangin. Ang mentalidad sa mga Sugboanon nakigkumboya na sa agas sa panahon alang sa kinatibuk-ang kalamboan.

Kini ang obserbasyon ni Gobernador Imee Marcos sa Ilocos Norte sa iyang pagbisita dinhi sa probinsiya sa Sugbo sa niaging mga adlaw.

Iya kuno nga namatikdan kining dako nga kusaban sa nakalabay nga panahon.

Matud ni Gobernador Marcos, kinsa kandidato pagkasenador sa midterm elections karong umaabot nga Mayo, nga sa pagligid sa panahon, daghan na ang higala sa iyang pamilya dinhi sa lalawigan Sugbo.

Gani, gibutyag ni Marcos nga sa panahon sa iyang amahan, sige kini og kadaug sa eleksiyon sa sa Sugbo. Kini bisan pa sa pagka-oposisyon sa mga Sugboanon. Kini ang butang nga dako og ikapasalamat ang banay nga Marcos sa mga Sugboanon.

Bitaw. Kon adunay dakong kausaban sa Sugbo, kana mao ang kapabilidad sa mga Sugboanon nga makabangon gikan sa unsa mang kalisdanan ug padayon nga magbaktas ngadto sa tumang kalamboan.

Apan dili usab sa ingon nga dali rang malimot ang mga Sugboanon sa panghitabo sa kagahapon. Samtang padayong silang nahinumdom sa kagahapon, mas dako ang ilang panan-aw ngadto sa unahan.

Mao nang abtik ra silang makabangon gikan sa katalagman.

Sakto gayud si Gobernador Marcos sa iyang obserbasyon. Dili makamao nga mohambing og kasuko ang mga Sugboanon ug wala sa ilang bokabularyo ang manimalos.

Hinuon kabahin na sa ilang kultura ang mobangon, mamapha ug mosirit na usab ngadto sa pagkab-ot og kalamboan.