Nitokar na sang karaang tapol
Gihangop sa mga Sugbuanon ang mas sagunson nga weather bulletins sa bagyong Samuel nga giluwatan sa Philippine Atmospheric, Geophysical and Astronomical Services Administration (PAGASA) sukad sa pagsud ini sa Philippine Area of Responsibility (PAR) dayong udto niadtong Dominggo.
Inay sa naandan nga tag-unom ka oras, may bag-o nang weather bulletins ang PAGASA matag tulo ka oras.
Nga gihimo na sa niagi pang pamunoan apan nabantayan lang sa mga Sugbuanon tungod sa mas dako nga atensiyon nga ilang gigahin sa mga bagyo nga may direktang nakahulga sa Sugbo ug Kabisay-an.
* * *
Apan nitokar na sang karaang sakit sa PAGASA sa ilang weather bulletin kagahapon sa buntag. Inay ilhon ang kinadul-an nga mga dapit nga maagian ni Samuel, nibalik sila sa karaang bisyo sa pagsubay sa labing inila nga dapit bisan labihan rang layoa sa rota sa bagyo.
Sa Severe Weather Bulletin No. 9, gibanabana sa PAGASA nga mahimutang si Samuel duol sa Mactan City, Cebu karong buntag (Miyerkules).
Gawas nga tapolan nga nisusi, sayop ang mapa nga ilang gitamdan kay ang nag-piyesta nga mga Oponganon makasulti nila nga di dakbayan ang Mactan.
* * *
Gisuwayan nako og butang sa Google Maps ang ilang gihatag nga coordinates (10.5°N, 124.°E) ug akong natultolan nga ang agian ni Samuel layo ra sa Mactan ug mas duol sa tungatunga sa Dakbayan sa Danao ug lungsod sa Compostela sa amihanang Sugbo.
Dihang mas gipadul-an, akong nabantang nga moagi ang bagyo duol sa mga barangay sa Tuburan Sur, Looc, Sabang, Sandayong Sur, Manlayag ug Cabungahan sa Danao.
* * *
Mas masaaron unta ang nag-unang Severe Weather Bulletin No. 8, nga giluwatan sa alas-5 sa kaadlawon, nga nibanabana nga maagian ni Samuel sa Miyerkules sa kadlawon ang Guinsanga-an, Inopacan, Leyte.
Wa magtinapolan ang PAGASA sa pagtumbok nga moagi ang bagyo sa mas inilang mga dakbayan sa Ormoc o Tacloban.
Apan angayng hangpon ang mas kusganon nga mga pasidaan sa PAGASA nga bisan hinay rang hangin di angayng mangiyugpos ang katawhan tungod sa gikahadlokang kusog nga uwan.
Mas sayo nga nakanselar ang mga klase sa tibuok Kabisay-an (gawas lang sa pipila ka pribadong eskuylahan nga nisukwahi) bisan hinay rang uwan hangtod sa akong pagsuwat ini.
* * *
- Latest
