Mga kontrabando sa CPDRC gidispatsar
CEBU, Philippines — Mga kontrabandong nasakmit sa operation greyhounds sa nanglabay nga mga operasyon gipangsunog ug giguba sa mga opisyal sa Cebu Provincial Detention and Rehabilitation Center (CPDRC) kagahapon.
Ang maong mga kontrabando nakuha sukad niadtong bulan sa Septiyembre samtang ang uban giingong boluntaryo nga gi-surrender sa mga piniriso.
Moabot 15 ka kilo sa tabako, 469 ka lighters, 476 ka pakete sa sigarilyo ug 178 ka cellphones nga touchscreens ug keypad type.
Apil sa mga kontrabando gidispatsar mao ang mga pisi nga gigamit pagpalusot sa mga kontrabando sa ibabaw sa paril, apan karon wala na kini magsilbi kay gibutangan na og net ang luyo sa CPDRC.
“Daghan na kaayo net nga among gibutang, surrounded na by net kay usually mga ala una, alas dos sa kaadlawon ipanglabay,” matud ni Reynaldo Valmoria ang warden sa CPDRC.
Niadtong Septiyembre 12 karong tuiga dunay mga kontrabandong nasakmit nga ilang gidispatsar sa niaging bulan. Dayon sa parehong bulan ang Police Regional Police nihimo usab og greyhound operation sa CPDRC kon diin ubay ubay gihapon nga mga kontrabando ang nakuha lakip na illegal nga drugas.
Si Valmoria miingon nga “selective greyhound” operation matag semana ang ilang gihimo ug nagkagamay na sab ang ilang masakmit apan di gihapon sila mohunong pagpahigaon og greyhound operation. (BANAT NEWS)
- Latest
