TRAIN ug VAT sa gasolina wad-on

Nalipay ko kay daghang mga opisyal sa kagamhanan nga nag-awhag gyud nga hunongon na ang pagpahamtang sa TRAIN Law ngadto sa mga petroleum products kay mosangpot kini sa pagbarato sa presyo sa gasolina, krudo ug uban pa nga mga produkto sa lana.

Dinhi sa Sugbo kaniadtong Sabado si Ilocos Norte Governor Imee Marcos ug kusganong miawhag nga ang TRAIN law sa mga petroleum products suspensuhon gyud labing menos usa ka tuig.

Gusto pa gani gyud ni Marcos nga wad-on na ang 12 percent nga Value Added Tax (VAT) sa mga petroleum products. Maayo unta og ipatuman dayon kini ni Presidente Duterte aron mobarato ang atong mga palaliton.

Tan-aw nako, bisan og si Imee Marcos midagan pagka senador ubos sa Nacionalista Party, apan bug-at gihapon ang iyang tingog ngadto kang Presidente Duterte kay suod man siya ni Davao City Mayor Sara Duterte nga anak sa presidente.

Karon, nag-anam-anam man tuod pagkunhod ang presyo sa mga petroleum products, apan sigurado man gud nga mosaka ra gihapon kini pagbalik. Matud ni Imee Marcos nga kon wad-on ang TRAIN law ug VAT sa petroleum products, sigurado nga mobarato gyud ang presyo sa krudo, gasolina ug uban pa, ug mobarato usab ang mga palaliton.

* * *

Nalipay kaayo ang kampo ni Mayor Tomas Osme?a nga ang kanhi Solicitor General sa nasud nga si Atty. Florin “Pilo” Hilbay misuporta sa tinguha sa mayor nga magtukod og dugang flyover ug underpass projects dinhi sa Sugbo.

Plano man gud ni Osme?a nga atol sa iyang termino magtukod siya og labing menos 16 ka flyover ug underpass projects, apan kay dako man kaayo ang gikinahanglang budget niini, mangita si Osme?a og pundo gikan sa nasudnong kagamhanan.

Matud ni Atty. Hilbay nga dako kaayo og bentaha ang pagbutang og mga flyover ug underpass projects sa mga “busy” kaayo nga eskina aron pag-abag nga momenos ang problema sa trapiko.

Nagtuo ko nga kini si Hilbay suportahan gyud ni Osme?a sa iyang pagpapili pagka senador tungod kay makatabang man kini kaayo sa mayor nga makakuha og pundo gikan sa nasudnong kagamhanan alang sa mga flyover ug underpass projects.

* * *

Apan nakamatikod ko nga daghang kandidato karon sa pagka senador nga mitutok sa programa nga matabangan ang mga kabus nga mag-uuma ug ang mga mangingisda.

Sa mga kandidato pagka senador nga mianhi sa Sugbo, sila si Imee Marcos, Atty. Hilbay ug si kanhi Kongresista Erin Ta?ada pulos dunay programa pagpalambo sa mga mag-uuma, mangingisda ug mga trabahador.

Matud ni Ta?ada nga angay’ng tun-an ang sistema pag-usbaw sa sweldo sa mga trabahador pinaagi sa mga Regional Tripartite Wages and Productivity Board.