Nindot nga pamolitika

Dunay pamaagi sa pamolitika nga nindot sundon sa ubang mga kandidato aron nga tabla ra sila og nanirador nga sa usa ka bala, duha ka langgam ang ilang maigo.

Gitug-anan ko sa akong mga amigo sa Vicente Sotto Memorial Medical Center (VSMMC) nga mikontak kuno kanila si Dr. Paulus Cañete aron mopundo og pasiuna nga P100,000 alang sa canteen sa ospital.

Kadtong mga pasyente ug ilang “bantay” gikan sa ikaunom nga distrito sa Sugbo, sama sa Mandaue City, Cordova ug Consolacion, moadto sa canteen sa ospital unya mokuha sila og pagkaon.

Bisan tuod og P50 lang nga kantidad sa pagkaon ang ilang ma-avail sa matag tingkaon, apan dako na kini og ikatabang kanila.

Nasayod ko nga pamolitika kini ni Dr. Paulus Cañete kay kandidato man siya pagka provincial board member sa 6th district, apan nindot kini nga programa.

Gihimo na kini kaniadto ni JVR diha sa Talisay, ug tuod, nidaog si JVR kay daghan man gyud kaayo ang nalipay sa iyang proyekto. Kamong ubang kandidato, sunda ninyo ang paagi ni Dr. Paulus.

Matud sa mga amigo nako sa VSMMC nga gipasaligan sila ni Dr. Paulus nga kon mahurot na ang pasiuna nga P100,000 dugangan kini og laing susama nga kantidad.

Dili ba nindot nga pamaagi? Pamolitika tinuod ni, apan makatabang sa mga kabus nga pasyente aron dili kaayo mobug-at ang ilang panginahanglan.

Saludo ko ni Dr. Paulus niini. Kauban diay namo sa media kini si Dr. Paulus ug tag-iya siya og estasyonan sa radyo nga nagbase sa Mandaue City.

* * *

Kadtong nagtuki ko dinhi kabahin sa isyu sa mga Marcos, nakadawat ko og daghang reaksiyon sa akong e-mail nga midayeg sa akong baruganan.

Misuporta sila sa akong baruganan nga ang mga anak ni kanhi presidente Ferdinand Marcos dili angay’ng apilon nato, kon may gikalagotan kita sa iyang mga ginikanan kaniadto.

Nakaingon ko nga mao diay tingali nga si Bongbong Marcos diriyot gyud makadaog dihang milansar pagka bise presidente, ug gani miprotesta man kini kang Vice President Leni Robredo.

Karon, ang igsoon ni Bongbong nga si Imee Marcos, nagsugod na usab sa pagsuroy sa lainlaing dapit sa nasud kay nagpapili pagka senador alang sa eleksiyon karong sunod tuig.

Nakabantay ko nga kanunay’ng gihugopan kini sa mga tawo. Dili ikalimod nga “name recall” man gud.

Sikat ang apilyedo nga Marcos mao nga ang mga botante mobotar gyud.

Kon wala ko masayop, kini si Imee gobernador karon sa Ilocos Norte, ug wala ko makadungog nga nalambigit og mga bati nga isyu. Salamat sa mga misuporta sa akong baruganan.