Pamolitika sa allowance alang sa kapolisan

Ang lokal nga kagamhanan sa siyudad sa Sugbo ug ang Philippine National Police angay unta magtinabangay alang sa kahusay ug kalinaw sa Dakbayan sa Sugbo.

Sa ubang mga lugar, suportado kaayo sa munisipyo o siyudad ang kapolisan. Apan dinhi sa siyudad sa Sugbo, dili suportado sa Cebu City Hall ang lokal nga PNP.

Tiaw mo na, mohatag lang og allowance ang Cebu City Hall nga ubos sa administrasyon ni Mayor Tomas Osmeña ngadto sa mga sakop sa kapolisan kun kini registered voter ug residente sa dakbayan. Kadtong dili botante sa siyudad, sorry na lang!

Ingon niini ang pagpiit ni Tomas sa kapolisan. Tungod tingale kini sa kapungot niya nga sa kampanya sa ginadiling drugas sa kapolisan, naigo iyang suod ug alyado nga si kanhi Kapitan Jessielou Cadungog sa maong kampanya.

Si Cebu City Police Office Director Royina Garma mireklamo sa polisiya sa kagamhanan sa siyudad nga gidominar sa Bando Osmeña Pundok Kauswagan (BOPK). Unfair sa dili mga taga-Siyudad sa Sugbo ang maong polisiya.

Ang asawa ni Tomas nga si Konsehal Margot Osmeña mitubag sa pamahayag ni Garma. Matud ni Margot nga dili angay personalon ni Garma ang polisiya pag-limit sa allowance sa mga botante ug residente sa siyudad.

Apan maayong masayod si Tomas ug si Margot nga ang “nature” sa kapolisan mao nga sibilyan kini nga organisasyon apan “national in character.” Buot ipasabot nga bisan dili Sugboanon mahimong moserbisyo dinhi sa siyudad sa Sugbo.

Apan nakaapas ko sa estilo sa mga Osmeña.

Buot nila nga ubos sa ilang pagdominar ang kapolisan. Gusto nila nga magsunodsunod lang nila ang mga polis. Apan karon nga nadestinohan og mga polis nga dili mosunod sa mga Osmeña, gihimoan nila kini og pamaagi aron ma-discourage pagpadestino dinhi sa siyudad sa Sugbo.

Kinsa may dili ma-discourage nianang polisiya nga kun dili ka taga-Sugbo, wala kay labot sa incentives?

Kay dili man mapaubos sa ilang pagdominar ang kapolisan, gipiit nila kini pinaagi sa paglisud-lisod sa ilang mga insentibo.

Sumala pa sa akong higalang retiradong kawani sa Cebu City Hall nga ang kapolisan gigamit kaniadto sa eleksiyon. Adunay mga polis kaniadto nga maoy gipa-harass sa mga residente nga dili mobotar sa kandidato nga hawod sa siyudad. Dili lang ko mosulti’g kinsa ning kandidatoha.

Kining gibuhat nila sa kapolisan kalapasan kini sa equal protection clause sa 1987 nga Konstitusyon. Asa man ang “valid classification” sa kapolisan nga botante sa Sugbo ug dili taga-Sugbo? Wala gyud. Silang tanan mga polis nga sakop sa PNP.

Unsa may naa sa mga polis nga registered voter sa siyudad sa Sugbo nga wala ug dili makit-an sa mga polis nga dili botante sa Sugbo?

Ning pagguyod sa politika sa PNP, dili ba kaha hitamparosan na gyud ni Pres. Duterte si Tomas?