EDITORYAL - Politika bisan asa

Ang kahapsay ug kalinaw sa usa ka lugar dili makab-ot kon way kapolisan ug dili mabuhat sa mga polis ang labing maayong kampanya kontra krimen kon walay suporta gikan sa lokalidad partikular na gikan sa mga lokal nga opisyal.

Dinhi sa Dakbayan sa Sugbo, nahimong dakong isyu tali sa kadagkoan sa Philippine National Police ug ni Mayor Tomas Osmeña ang kabahin sa suporta sa siyudad ngadto sa kanila.

Subay sa balaod, deputized sa National Police Commission ang tanang chief executives sa Local Government ug duna silay operational control sa mga polis sa ilang mga lugar ug may tingog usab pagpili kinsay mangulo sa kapolisan sa ilang lugar.

Apan kinahanglan nga tabangan sa LGUs ang ilang local police aron mas madasig sila sa ilang trabaho. Ang siyudad nihatag og mga sakyanan, armas, gamit sa komunikasyon, binuwang nga insentibo ug uban pa sa CCPO kaniadto.

Apan sukad nga milingkod si Duterte, wala na makatingog ang mayor  hasta sa pagpili kon si kinsa ang molingkod sa CCPO . Kini maoy sinugdanan nga niaslom ang relasyon nila ni Osmeña ug CCPO director Sr. Supt. Royima Garma ug ang labaw niini sa Police Regional Office-7 nga si Chief Supt. Debold Sinas.

Karong bag-o, si Garma nagtuong gipolitika ang binuwang cash allowance sa mga polis sa siyudad. Kay kadto nalang mga nadestino ug botante sa Cebu City nga mga polis maoy tagaan niini. 

Nasayran nga gawas sa mga polis, hasta ang ubang sakop sa law enforcement units ug kabomberohan nga nadestino ug botante dinhi sa Cebu City mao na lamang  hatagan sa siyudad. 

Dili man tuod makareklamo ang mga polis kay kinahanglan man gihapon silang motrabaho may insentibo man o wala apan unsa nalang kahay bation sa dili taga Cebu City nga nadestino dinhi?

Makapangutana gyud ang publiko kon unsay motibo sa mayor ilabi na nga naghinangat na ang eleksyon.