Baratong gasolina maka-traffic sab

Bisan og dunay sagunson nga pagkunhod sa presyo sa fuel products, sama sa gasolina ug krudo, apan dili gihapon kini angay nga ikalipay pag-ayo.

Ngano man? Taas pa gihapon ang presyo sa gasolina.

Nakahinumdom ko nga miabot na unta kadto og P19 ang litro sa krudo, unya nagsige na lang og saka hangtud nga miabot na og P50.

Napugos man gani ko nga anha na lang intawon pagpatubil og krudo sa barato nga gasoline station, apan ang presyo pagka karon miabot pa gihapon og P46 ang litro.

Ambot, kay karon kunong adlawa duna may pagkunhod na usab sa presyo.

Abtik man gud ang mga dealer sa petroleum products kay samtang mopaus-os sila sa presyo sa ilang baligya, gagmay ra, apan kon mopasaka sa presyo, dagko kaayo.

Malipay ko kon mobalik ang presyo sa litro sa krudo og bisan P30. Apan mao lagi, ang epekto sab niini, mosamot kagrabe ang traffic.

Kon barato ang gasolina ug krudo, kadtong mga tag-iya og sakyanan nga unta nagtipid ug dili na mogamit sa ilang mga awto, mopadagan na pagbalik. Ang resulta, mosamot ang traffic.

* * *

Tan-awon nato og unsay aksiyon sa opisina ni Presidente Duterte kay ako na nga gipadad-an og komunikasyon kabahin sa wala pagtagad sa kapolisan sa mikuyanap nga mga illegal nga sugal dinhi sa Dakbayan sa Sugbo.

Suwayan lang nato kay ang higala nako nga opisyal sa Malacañang mitudlo nako kon kinsay hatagan sa reklamo. Mauwaw na ko sa mga mireklamo kabahin sa ilegal gambling.

Dunay mga senior citizens diha sa Barangay Pasil nga nagsige og reklamo kay saba kuno kaayo ang mga magduwa og video karera sa duol sa ilang balay, ug dili sila makatarong pagkatulog.

Gipadangat na nako kining maong problema ngadto kang Senior Superintendent Royina Garma, ang direktor sa kapolisan sa dakbayan, apan wala may aksiyon.

Mituo man si Garma sa pamahayag sa iyang mga station chief nga wala na kuno’y illegal gambling machines ug ubang illegal gambling sa ilang lugar.

Unya, awhagon usab nato ang provincial direktor sa kapolisan sa Sugbo kay ang report nga miabot kanako, pwerteng pagdagsang sa mga video karera ug moli-moli diha sa Talisay City, ug sa ubang dapit sa probinsiya.

Ang report nga miabot nako nagtug-an nga dunay operator og mga video karera diha nga ang angga, Danny. Palihug kuno sa pagsusi niining maong report.

Mangutana sab kita sa mga polis diha sa Talisay kon nganong gisundog man ninyo ang mga polis diri sa Dakbayan sa Sugbo nga gipasagdan ra ang mga illegal gambling machines?