EDITORYAL - Politika sa basura
Labad sa ulo dili lang sa mga opisyales sa Dakbayan sa Sugbo kining pagkolekta sa mga basura sa siyudad ug sa kabarangayan kondili sa mga molupyo usab niini.
Nahimo kining isyu gumikan kay nagamit man sab kini sa politika sa oposisyon ug administrasyon sa siyudad.
Sa paglingkod ni Mayor Tomas Osmeña mas pabor siya nga mangabang og mga pribadong haulers nga maoy mohakot ug molabay sa basura.
Samtang kaniadto sa panahon ni kanhi mayor Michael Rama, namalit og mga trak ang siyudad ug ang mga barangay aron maoy mohakot sa basura.
Ang siyudad na maoy mobayad kada tonelada sa basurang direktang dad-on sa pribadong landfill sa Consolacion.
Sa paghinangat sa eleksyon niadtong 2016 nahimo kining isyu ug gigamit sa kasamtangang administrasyon batok sa mga naglingkod kaniadto.
Human sa dul-an duha ka tuig, gusto na karon sa siyudad nga mamalit og mga bag-ong compactor trucks panghakot og basura.
Milyones pesos pud ang nagasto sa siyudad sa pagabang sa mga pribadong haulers nga mokolekta sa mga basura gikan sa mga barangay ug mohakot niini padung sa sorting station diha sa Inayawan ayha pa hakuton og laing haulers padung sa pribadong landfill. Mao usab sa pamaaging gipamalit ang mga trak.
Ang pangutana, asa kaha mas nakabarato ang mga Sugboanon sa duha ka pamaagi?
Angay tingaling pasabton sa mga opisyales sa siyudad ang katawhan bahin niini, apan kanang dili panahon sa kampanya aron walay bulok pamolitika.
Tinuod importante gyud nga mahakot ang mga basura matag adlaw kay manimaho gyud ang siyudad kon wala niini.
Apan dili unta nila kini gamiton sa pamolitika kay maayo man ni silang mga opisyal mga adunahan man ug makakita sila og pamaagi pinaagi sa ilang kwarta paglabay sa ilang mga basura. Apan magunsa man ang mga kabus?
Hapit na raba sab ang eleksyon. Diha palang sa maong isyu mahimo nang hukman ang mga mokandidato sa sunod nga piniliay.
- Latest