Samad sa pulitika

Human na ang pagduso sa sertipiko de kandidatura. Ug niining pag-arangkada na sa mga kandidato alang sa piniliay sa sunod tuig, daghang estorya ang naglikos karon sa pulitika kabahin sa mga relasyon nga nabugto gumikan lagi sa ambisyon.

Hinuon, matud pa sa kaaran nga panultihon, sa pulitika walay permanente nga amigo ug kaaway. Ang permanente mao lamang ang personal nga interest. Gani bisan pa ang mga sakop sa pamilya dili kalikayan nga magsungag alang sa ilang tagsatagsa nga interest.

Hinuon dili na ikatingala pa nga adunay mga sakop sa pamilya ang mag-away sa pulitika. Daghan nang mga kaso dinhi sa nasud nga halos magpatay na ang mga magsuon tungod sa ilang paglumba alang sa mga posisyon sa gobiyerno.

Karon nga umaabot na ang eleksiyon, ubay-ubay na usab ka pamilya sa nasud kansang mga sakop ang nagkaguliyang tungod lagi kay nagsungag sa usa lamang ka posisyon. Igsuon batok igsuon, papa batok mama, papa batok anak, mama batok anak.

Didto sa kaulohan, baniog na ang dili maayong relasyon sa managsuong Senador JV Ejercito ug kanhi senador Jinggoy Estrada. Sa sunod piniliay, pulos sila modagan pagka-senador. Kon kinsa ang modaug kanila, mao kana ang dakong pangutana karon.

Didto sa Dakbayan sa Makati, maoy magsangka pagka-mayor ang managsuong Binay. Si Mayor Abigail Binay magpasubli kontra ang iyang manghud nga si Junjun Binay, ang kanhi mayor usab sa maong dakbayan.

Ug dinhi lamang sa probinsiya, adunay mga pamilya nga naguba tungod sa hilo sa pulitika. Sa Siyudad sa Mandaue, mikuyanap na ang balita mahitungod sa walay maayong relasyon sa mga sakop sa pamilyang Quisumbing. Gani, karong umaabot nga eleksiyon, ang apohan ni Mayor Luigi Quisumbing adto man mosuporta sa iyang kaatbang pagka-mayor nga ni Kongresman Jonas Cortes.

Hinuon kining mga panghitabo normal na nga eksena sa pulitika sa nasud. Apan sa ako nang  gikaingon, walay permanente nga kaaway sa pulitika. Moabot ra gihapon ang panahon nga moayom ang samad sa relasyon niining magkaaway nga mga sakop sa pamilya.