Millennial Voters

Nahuman na gyud ang filing sa Certificate of Candidacy COC diin naghugop kagahapon sa buhatan sa Commission on Election COMELEC ang mga mikandidato sa umaabot eleksyon.

Apan sinugdanan pa lang kini sa kombate sa politika, lauman nato nga magbinombahay na usab ni og isyu batok sa usa’g usa.

Hinuon mao naman kini ang naandan kada eleksyon, aw dili lang gani panahon sa eleksyon kay ang uban hagbay ra namolitika.

Ambot lang kong pareha ba gihapon kaniadto ang mga botante nga madala gihapon dili lang sa bolatik sa mga kandidato kon dili hasta pud sa tinagingting sa kwarta?

Apan mura’g naa koy kahayag nga nakita sa mga bag-ong tubo o ang gitawag nga millennial voters nga dili gyud mahimong diktahan ni bisan kinsa.

Aduna silay kaugalingon nga panglantaw sa mga panghitabo sa ilang palibot. 

Gani dunay mga isyu sa kasaysayan nga natuis base sa gituohan ug panglantaw sa mga millennials gamit ang social media.

Lakip niini ang nahitabo kaniadto sa martial law nga giisip sa katawhang Pilipinhon nga labing ngitngit nga adlaw sa atong kasaysayan.

Apan lahi ang panglantaw sa mga batan-on kay sagad sa mga komentaryo sa mga millennial netizens mipabor man sa diktador.

Laing sumbanan ang Chiong sister murder case kansang mga responsable gikonbikto sa korte.

Apan ang simpatiya sa mga batan-on atoa kang Paco Larañaga usa sa mga konbiktado.

Ang pagdaug og una sa kasingkasing sa mga millennial voters maoy paningkamotan sa mga kandidato kon gusto sila makadaug.

Kinahanglan nga mosagop ang mga tradisyonal nga politiko sa kabag ohan aron dili sila mabiyaan.

Ang mga batan-on giisip nga matinumanon sa gusto kon unsay magustohan mao gyud ang iyang pilion.