Gwen vs Agnes

Nahitabo gyud ang dugay na’ng huhungihong nga si Bise Gobernador Agnes Magpale maoy modagan pagka-gobernador sa eleksiyon sunod tuig. Gitag-an ko nang daan human pa lang sa 2016 Elections nga si Magpale duna gyuy plano nga mag-gobernador tungod sa kanunay niyang pagpakita sa kalungsuran.

Ang iyang unang pagdikidiki nga modagan kay kuno siya gusto na nga mopahuway sa politika kabahin lang sa iyang drama. Kung sa mga sugarol pa, padugang sa pusta.

Ang pagdeklar ni Magpale sa iyang kandidatura pagka-gobernador ug ang pag-atras ni Gobernador Hilario Davide III aron mokandidato nalang isip bise gobernador dili sulagma. Kabahin ni sa dugay na niyang plano nga gibuligan sa kahigayonan tungod sa haguka nga liderato ni Davide. Way kapilian si Davide gawas sa pagtuboy ni Magpale tungod kay gibiyaan na siya sa iyang mga mayor.

Bugtong nahabilin nga nagpaluyo niya mao nalang ang grupo ni Magpale nga gilangkuban sa mga Durano sa fifth district ug Kongresista Peter John Calderon sa seventh district nga paryente ra sab sa mga Durano.

Bisan si Kongresista Wilfredo Caminero sa second district way siguro nga magpabilin ba ni Davide tungod kay nagkinahanglan sab kini sa suporta sa “cuadro alas” diha sa habagatang Sugbo.  Busa mosugot siya ug sa dili way kapaingnan si Davide.

Ang maong kalambuan hinuon naghatag og dugang bulok sa politika dinhi sa Lalawigan sa Sugbo. Ang panag-engkwentro sa kanhi kaalyado nga nahimong higpit ron nga karibal sa politika makapabuhi sa demokrasya.

Si Magpale dunay suporta sa tulo ka kongresista, Caminero sa segundo, Calderon sa ikapito, ug Red Durano sa ikalima nga distrito. Si kanhi gobernador ug karon Kongresista Gwen Garcia sa pikas bahin kontrolado ang tirsero distrito diin siya maoy kongresista, gipaluyohan ni Kongresista Benhur Salimbangon sa ika-upat nga distrito, Kongresista Samsam Gullas sa unang distrito ug Jonas Cortes sa ika-unom nga distrito.

Anaa sab uban ni Garcia sa PDP-Laban ang hapit tanang mayor sa kalungsuran ug mga dakbayan sa lalawigan. Kun sa tigbakay pa maisip nga inilog si Garcia sa maong sangka tungod kay siya maoy kandidato sa partido ni Presidente Rodrigo Duterte!

Ang kampo hinoon ni Magpale nangangkon nga duna silay alyansa uban sa regional party ni Davao City Mayor Sara Duterte, ang Hugpong ng Pagbabago. Iyang gibiyaan ang Liberal Party human nila gipahimuslan.