Kinabuhi karon

Nakugang ko sa dihang nakita ko sa internet ang taho kalabot sa bata nga nakaluwas gikan sa mga hulmigas ug kainit human siya napalgi sa kasagbotan didto sa Cagayan de Oro. Sa ato pa, gilabay siya. Ug kinsa man ang naglabay, wa ta masayud. Nahimong komon kining maong talan-awon karon nga mga batang masuso ilabay na lang human sila ipahimugso. Sa ato pa nahimong disposable ang kinabuhi nila. Dili buot og commitment, dili buot og sakripisyo.

Gani mas mahal pa tingale ang sili kaysa kinabuhi sa tawo. Mahimong tikloon na lang gani ang si bisan kinsa o dili ba kaha mahimong hikalimtan ug pagutman ang batang way kalibutan sa binuhatan sa iyang mga ginikanan. Unta ning maong balita mahigmata ang kadaghanan kanato nga dinhi sa kalibutan bisan pa man kun paspas ang teknolohiya nahimo namang tun-as pud ang atong baruganan ug pagpakabana sa kinabuhi sa uban.