Stress pakalmahon sud sa 5 ka minutos (1)

Tagsa-tagsa nato nakigkombate sa kinabuhi kada adlaw mao nga dili gyud kalikayan nga hamokon kita sa pagkaluya nga gitawag og stress.

Reyalidad kini nga walay gipili nga matang sa sitwasyon sa kinabuhi, maugtas kita sa labihang paningkamot, halos ang utok di na kapahulay sa sigeg pangindahay.

Hinoon naanad na kita, nga may mga sitwasyon nga ingon niini. Ang mga tawo aduna say lainlaing paagi sa pagkontrol sa makaugtas (stressful) nga gimbuhaton.

Sa uban ila lang kini gibalewala, hangtud naamgohan nga nakadaut na diay kini sa kaugalingon.

Dili tanan ang nasayod nga ang stress mahimong madebelop nga usa ka laygay nga sakit (chronic disease), ug mosangpot sa seryuso nga kondisyon sa panglawas ug wala gyud niini ang kaayohan nga mahatag kanato. Igo lang kita sa pag-antos uban ang pagmahay nga wala dayon kini masayo sa pagtagad.

Busa, mao ni hinungdan ngano importante nga makamata kita ug tun-an  ang pagbuntog sa stress ug hasta sab ang mga paagi nga maalibyohan ang kaugalingon batok sa pagkaugtas  o stress.

Sa ingon, dili ta magkasakit, molahutay sa unsa may tinguhaon nato niining kinabuhia.

Sa Japan, ang mga Hapon adunay pamaagi kon unsaon pagdala ang lainlaing mga sitwasyon, ug nadiskubrehan nga aduna silay lahi o espesyal nga pagbuntog batok sa stress.

Sa sunod natong gula, atong tukion kining ilang mga pamaagi aron usab kita makapahimulos ug magamit para sa atong kaugalingon.

Matud pa nga sa ilang pamaagi, mawala dayon ang stress sud lang sa  lima ka minutos.

Makapahulay ug makapawala sa gubot ug libog nga gipanghunahuna.