EDITORYAL – Taktika sa politiko

Hinay-hinay nang nanggawas ug nipakita sa publiko ang mga nagkadaiyang mga kandidato sa umaabot nga local ug national elections nga mahitabo sa bulan sa Mayo sa sunod tuig.

Ang mga local nga buhatan sa Comelec gidugok na sa mga kandidato, mga beterano ug mga bagito pang politiko. Samtang daghan usab ang gustong magpasubli sa katungdanan ug nangambisyon og mas taas nga posisyon.

Nakita usab ang lain-laing mga taktika apil na gani mga palihing gigamit usab sa mga mokandidato sa pagtuong masiguro ilang kadaogan sa umaabot nga piniliay.

Adunay ubang kandidato nga mipaubos sa posisyong daganan samtang aduna say nga misaka sa sunod nga mas taas nga posisyon.

Adunay uban nga petsa maoy ilang giagad sa pag-file sa ilang certificates of candidacies ug may pakapin pang mga pasundayag aron lang gyud sila matiman-an sa mga botante.

Dili usab kalimtan kining ubang mga politikong murag “langaw nga pula og lubot” kay magsige og balhin-balhin og partido matag eleksyon.

Samtang tuod ang uban tinud-anay nga serbisyo ang tumong sa ilang pagdagan, apan ang uban kaduhaduhaan pa gyud ang intensyon ilabi na kadtong mga bagito pa sa politika.

Kaning palihi dili lisod sabton kay kabahin na sa tradisyon ug kultura sa mga Pilipino sa bisan unsang ilang gustong buhaton.

Apan kaning ubang taktika usahay way kapuslanan ang kahulogan kay makapaduda man hinuon kon tinuod bang panerbisyo ilang tumong kay pwedeng ang tumong mao lang gyud nga pagpabilin sa pwesto o gahom.

Adunay uban nga nakahibalong tungod kay wa silay maayong labok ug dako ang posibilidad nga pildihon, imbes nga moundang na lang sa politika, mosugot na lang  sa mas ubos nga posisyon.

Bahala na lang unta kon unsa pang taktikaha o palihi ang ilang buhaton basta ang pagpangalagad gyud sa katawhan ang ilang tumong ug dili ang pagkahakog sa gahom.