Kinsay ka tandem ni Gwendolyn?

Nagkainit na ang dagan sa politika sa nasud ug daghan na ang miduso sa ilang certificate of candidacy alang sa mga nasyonal ug lokal nga posisyon alang sa piniliay sa sunod tuig.

Ug daghan pa karon ang mo-file sa ilang COC sa paghinapos na sa filing sa kandidatura.

Dinhi sa lalawigan sa Sugbo, pipila pa lamang ka politiko ang miduso sa ilang COCs. Hinuon, sugod karong adlawa, makapaabot kita nga dakong bul-og sa mga mokandidato ang magpanon ngadto sa lokal nga mga buhatan sa Commission on Elections.

Si Third District Representative Gwendolyn Garcia ang nag-una sa mga mokandidato kinsa mi-file na sa ilang kandidatura. Miuban kaniya sa iyang pag-file ang iyang manghud nga si Pablo John kinsa buot mopuli sa iyang puwesto sa Kongreso.

Apan wala pa mahibaw-i kon kinsa gayud ang runningmate ni Garcia alang sa eleksiyon. Adunay mga dagkong ngalan nga mitumaw apan mayoriya kanila mora’g dili man interesado modagan pagka-bise gobernador.

Hagbay ra nga gihugonhugon ang ngalan ni Fourth District Representative Benhur Salimbangon. Apan mibalibad ang kongresista tungod lagi kay mo-concentrate kini sa iyang distrito diin modagan iyang asawa alang sa iyang posisyon.

Mitumaw usab ang mga ngalan ni First District Representative Samsam Gullas ug kanhi Naga City Mayor Val Chiong isip posible nga runningmate ni Garcia.

Apan mingaw man sila sa maong tanyag ug mora og dili interesado nga modagan alang sa pagka-bise gobernador.

Ambot kon kinsa ang runningmate ni Garcia. Matud niya nga ila ra nga ibutyag kon kinsa kini sa tukmang panahon. Apan kon si kinsa man ugaling kini, kinahanglan nga aduna kini kapabilidad pagtuboy sa ila nga tandem.

Hinuon, dako pang lalisonon kon aduna bay winning formula ang runningmate ni Garcia batok sa tang-an ug eksperyensiyado nga si Bise Gobernador Agnes Magpale. Apan nagtuyok pa ang bola ug layo pa ang eleksiyon. Makita ra unya ang katag.