Apo Land may tulubagon ba?

Daan nang nanghunaw sa iyang mga kamot si Apo Land and Quarry Corporation (ALQC) Representative Chito Maniago nga bisan tuod sila adunay rights nga mohimo’g quarry sa kabukiran sa Sitio Sindulan, Tinaaan, Naga City, pero wala pa gyud nila kasugdi pag-quarry ang maong dapit-nahitaboan sa grabeng landslide nga mihunos og daghang kinabuhi.

Hinuon, miangkon siya nga ang adunay mga trabahante nila nga mihimo’g site-road development sa maong dapit, diin may mga heavy equipment nga gipanggamit, pero wala gyuy quarrying nga nahitabo.

Nalimot ang maong representante sa nakat-onan nato sa  Physics bahin sa Waves ug Current Travels sa mga butang nga mahilabtan. Sama pananglit sa pisi nga gigunitan sa masig ka tumoy sa duha ka tawo. 

Bisag tandogon lag hinay ang pisi didto sa nagkupot niini sa usa ka tumoy, mobiyahe gyud ang current niini subay sa linya hangtod sa dapit nga maabot sa gikusgon sa pagkatandog. Sound also travels for as long as there is a line connecting with both ends.

Sama sa linaw’ng tubig sa swimming pool, diin sa higayon nga may butang nga motugsaw sa bisag asang bahin, maapektohan gyud tanan. Molihok gyud ang tubig nga nahikatulog.

 Unsa na kaha ang bukid sa Tinaan, Naga City, diin bisag may report nga aduna nay bahin nga nangliki giungad  gihapon sa mga heavy equipment  tungod  sa gipahigayong site-road development agig preparasyon sa dili pa sugdan ang quarry sa maong dapit? Unya, gibundakan pa sa makusog ulan tibuok gabii, kinsa man kunong bukira ang dili malumpag?

Mao nga bisag moingon pa ang ALQC representative nga wala sila mag-quarry didtong dapita, naapektohan gihapon ang naasoy’ng lugar  sa gihimong site-road development pipila ka adlaw ang nakalabay sa wala pa moabot ang trahedya.

Gani, kon ang bara iugbok sa semento, mabati man nato ang wave or current sound sa atong nahimutangan bisag atoa ra ta sa layo? Unsa na kaha kon ang mga heavy equipment na ang mopukpok sa bukid?

Hinuon, mga simpleng pangutana ra kini nga angay ikonsiderar sa mihimo’g makuting imbestigasyon  sa  naasoy’ng gumonhap.

Ug dinhi, atong masukod, kon ang ALQC may tulubagon ba?