Lotto outlets gihulmigas
JAV, BANATI! - Javier Yntig Tapulado (Banat) - October 11, 2018 - 12:00am

Mga baligyaana’g lotto, gagmay o dagko mang outlets, daw asukar, gidugok sa minilyong hulmigas (aw, tawo, diay!). Tiaw bay, sa pagsulat niini, Oktubre 3, ang lotto jackpot para sa 6/58 nga kombinasiyon nikabat na og P849, 578,320.00! Kinsang buanga ang dili matental pagpalit og mga numerong makahaw-as sa kalisud?

Grabe ka in-demand ang panginahanglan sa lotto. Gilinyahan, gipangadyean ug gipanag-awayan. Sa niagi lang duha ka semana, diha sa usa ka lotto outlet sulod sa One Pavilion, Banawa, ning siyudad, alas 4:00 pasado sa hapon, nanag-alirong na ang mamalitay og tiket tuyok sa maong outlet – nagpaabot sa tindera, kinsa wala diha kay tingale nidalikyat og kaon sa nadelatar nang paniudto, timaan nga tungod sa kakusog-non-stop nga hinalinay, jingle ra ang pahinga. Meaning, ang pag-adto sa CR mao ray panahong makapahulay.

Nagkapuliki ang tindera sa pagpanawat sa nag-ilogay’ng  kamot naglumba og tunol sa mga numerong gusto nga patdan. Busa, iyang gipalinya. May senior citizen na-high blood kay bisag mas una pang naabot sa uban, mao pay naulahi. Unsaon, mga guwapong batan-on man ang gipaboran sa nagmug-ot nga tindera. Nagsalig lang kay ang giapas sa mga kustomer, dili ang daginoton niyang nawong, kon dili ang minilyong salapi sa lotto! Ay, gikasuk-an siya sa tigulang, uy! Aw, pwerteng gubaa sa hitsura sa babaye nga guba nang daan!

Sa restaurant nga akong kan-anan, bisag didto sa rest room, ang hunahuna sa tawo giulipon na sa lotto. Lalim bay bisag alas 6:00 na sa gabii, dinhay ginang nga nanawag sa iyang anak pinaagi sa selpon, nga papun-an kunog taya og laing mga numero ang napalit na nila daan. Niyamar pa gyud nga P6,000 (six thousand pesos) ang ipadugang kay basig mao kini mogawas. Pastilan, no, gipuhunan gyud diay ni sa mga datu?

Ultimong mga kabus, nangiyawat! Lakip ang igpapalit og bugas, gipalit og lotto. Hastang halin sa pagpamasura, ang kita wala mopaingon sa tiyan, tua na sa lottohan. Mao nga nakakomentaryo si Boss Fil, nga kini kunong PCSO labaw pa sa panagatan nga Sensoro. Kay ang klase sa mga mata sa pukot nga gigamit sa PCSO, gagmay kaayo, diin ultimong mga uyabang o pinong kinabuhi sa dagat gidaginot. Giapil sa pagsikop!

 

 

LOTTO OUTLETS
Philstar
  • Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

SIGN IN
or sign in with