Salamat gyud kayo

Kini ang akong nabungat sa dihang ang akong higala nitunol sa grasya alang kuno sa among piyesta. Nauwaw unta ko nga modawat niini apan matud pa niya dili kini angay ikauwaw kay lagi alang man kini sa uban ug sa katawhan nga nagkinahanglan panahon sa kapistahan. Sa iyang paghatag niini, luyahon na ang iyang lawas ug hinay na ang iyang mga lakang apan pabiling lig-on ug kusgan ang iyang baruganan diha sa pagpanginlabot sa simbahan ug sa uban.

Ang iyang pagkamanggihatagon nakapadasig nako nga mohatag usab sa bisan unsa nga akong nahuptan ug uban ang kalipay mopaambit niini sa uban kay pinaagi lamang niini makita nako ang kamatuoran nga bisan unsang akong nahuptan dili diay akoa kon dili iya sa Kahitas-an.