EDITORYAL - Pagpahilom sa media

Daghang mga tigbalita sa kalibotan ang gipangkasohan sa ilang mga gobiyerno gumikan sa pasangil nga nagpakatap og mga sayop nga balita o fake news.

Ang depensa sa mga nangiha dili mao ang nigawas nga balita sa gipagawas nilang pamahayag ug tungod niini sayop ang impormasyong naabot sa katawhan nga posibleng nakamugna og kagubot sa ilang tagsatagsa ka mga nasud.

Sumala pa sa Committee to Protect Journalists (CPJ) nga usa ka non-government organization nga nagbase didto sa Amerika nga nangusog alang sa katungod sa mga tigbalita sa tibuok kalibotan miingon nga daghan ug nagkadaghan pa gyud ang mga tigbalita nga giatake sa nagkalainlaing gobiyerno.

Gawas sa mga gipapriso, adunay gihasi apil ang pamilya ug ang uban gipapatay gyud aron lang pahilumon.

Kaning pagpahilom sa mga tigbalita ginamit ang mga hinimo-himong mga rason ug ang uban naghimo gyud og mga palisiya aron pahilumon ang mga tigbalita nga dili sila masaway bisan sayop na ilang gihimo.

Kaning pagpahilom sa media peligro kaayo dili lang sa katungod sa mga tigbalita kondili hasta sa katungod unya sa mga yanong katawhan sa gawasnong pagpadayag.

Usa pa, nakatampo kining mga netizens nga may abilidad sa paggamit sa kompyuter pinaagi sa pag-usab sa unod sa tinuod nga balita aron himuong sayop ug ipatik og balik sa internet nga daw gikan mismo sa opisyal nga website sa news outlet.

Natural nga ang resulta, ang news outlet ug ang nagsuwat maoy han-okan ug pasanginlang nagpakatap og fake news.

Problema usab kay dunay uban nga mas motuo sa balitang gikan sa di lehitimong sources nga bisan giunsa na pagpasabot bahin niining maong mga pekeng tinubdan sa impormasyon, gahi pa sa kubal mopatuo.

Ang sayop nga balita maoy ilang tuohan samtang tinuod nga balita kon sukwahi sa ilang gituohan isipon nilang fake news.

Samtang nagkadugay paggamit sa internet adunay mga tawong nawad-an na og moralidad ug hustong pagpaminsar kay nabutahan na sila sa panatikong pagtuo.