“Mama Sakit na kaayo!”

Walay makatupong sa kasakit nga gibati sa usa ka biktima nga magsud-ong nga inanay’ng nahutdan sa gininhawa ang mga mahal sa kinabuhi kinsa kauban niyang natabonan sa yuta atol sa landslide sa siyudad sa Naga. Siya ang 16 anyos nga si Jonalyn Siton, kauban niya ang inahan ug duha ka manghud sulod sa ilang pinuy-anan dihang nahitabo ang trahedya.

Sumala sa dalagita nga kalit nga dunay mibuto dungan sa pagtay-og sa yuta nga abi niya’g linog.

Milagubo ang ilang balay nga nahugno ug gihandos sila sa yuta padung sa lababo sa kusina.

Dali niyang napunit ang kwatro anyos nga manghud nga iyang gibutang sa dughan. Giub-an sila sa ilang inahan aron dili maigo sa yuta hinungdan nga naka- survive si Jonalyn.

Ang iyang kwatro anyos nga manghud wala untay tatsa sa lawas apan nakalas tungod kay naglisod sa pagginhawa sa ilawom.

“Mama sakit na kaayo” kini ang sige og singgit sa bata nga gahilak hangtod nabugtoan sa gininhawa.

Gipahit pa ni Jonalyn ang tudlo sa manghud aron mohilak apan wala na mobati sa kasakit, gisuwayan niya og huyop ang ilong apan napilde na gyud ang manghud.

Sakit man ang pagkadat-og sa yuta sa lawas ni Jonalyn apan mas sakit ang iyang gibati nga nasaksihan ang inanay nga pagkawagtang sa kinabuhi sa pinangga nga manghod.

Naugkat nga buhi ang iyang mama apan namatay kini sa hospital tungod sa damage sa iyang lawas.

Dili matukib ang kasakit nga gibati dili lang ni Jonalyn kon dili lakip sa tanan nga nabiktima sa trahedya.

Daghan pa ang mga biktima nga wala pa igkita kinsa nalubong nga buhi sa landslide.

Panawagan nila ang hustisya apan kinsa man ang manubag?

Tataw pa sa siga sa adlaw ang tubag, unta mahatagan og katumanan ang tuaw sa mga nabiktima.