EDITORYAL - Salikwaot Paminawon

Ug duna na gyuy warrant of arrest nga gipagawas batok kang Senador Sen. Antonio Trillanes IV tungod sa kaso niyang rebelyon sa panahon pa ni kanhi presidente ug karon Kongresista Gloria Macapagal Arroyo.

Si Trillanes maoy labing isog nga kritiko ni Presidente Rodrigo Duterte ug maoy nahimong pambato sa oposisyon. Daghang mga matud pa kahiwian nga nakita si Trillanes kang Duterte, pamilya ug mga kaalyado sa pangulo.

Sa dihang mipagawas si Duterte sa Proclamation 572 nga nagpawalay-bili sa amnestiyang gihatag sa administrasyong Aquino kang Trillanes daghan ang miisa ang kilay kay giisip kini nga pamaagi sa administrasyon aron siya pahilumon.

Ang Korte Suprema wala pa makapagawas og desisyon sa petisyon ni Trillanes nga nagkwestyon sa legalidad sa proklamasyon ug igo lang miingon nga  ang lower courts lamang ang makaresolba niini.

Way polis o sundalo nga nangahas pagsikop niya diha sa Senado kay way warrant of arrest. Apan kagahapon, ang  Makati Regional Trial Court Branch 150 mipagawas na og warrant of arrest batok sa senador.

Matud pa nga ablihan pagbalik ang iyang kasong rebelyon apan dili apilon ang uban pang mga rebeldeng sundalo nga kauban ni Trillanes nga nakasuwat sa amnestiya. Pipila sa mga kauban ni Trillanes naa karoy pwesto sa gobiyerno sama ni kanhi Customs commissioner Nicanor Faeldon ug uban pa.

Ang gisaligan ni Trillanes mao na lang ang Konstitusyon nga diin nagdili sa “double jeopardy” o ang pagkiha sa usa ka tawo kaduha sa kaparehas gihapon nga kaso.

Salikwaot man paminawon kining mga pagduda sa rason sa paggawas sa warrant, apan isip tinahod nga senador ug kanhi opisyal sa militar nga mosunod sa kamandoan, kinahanglan niya kining atubangon.

Samtang mapaabot gyud nga aduna unyay hukom  ang korte sa iyang kaso, bahala na usab ang katawhan mohukom kon sa ilang tan-aw sakto ang gibuhat sa pangulo o sayop.