Pagpabaya

Sigun sa balita kagahapon sa buntag mikabat na sa 46 ka mga patay nga lawas ang naugkat sa nagtinabangay sa pagpangita sa mga nadat-ogan sa 80 kapin ka ektarya nga yuta sa bukiran nga bahin sa Dakbayan sa Naga sa lalawigan sa Sugbo.

Sa imong pagbasa ning akong lindog karon seguro ko nga aduna na pud napuno sa gidaghanon sa mga patay nga naugkat ug magpadayon pa ang pagtaas sa gidaghanon hangtod nga imando na sa awtoridad ang pagpahunong na sa gipahigayon nga search and retrieval operation.

Samtang nag-ihap ta dinhi sa Sugbo sa mga namatay tungod sa pagdahili sa yuta sa dakbayan sa Naga, mao pud ni ang gihimo didto sa Itogon sa Benguet tungod sa daghan pud nga nalubong sa yuta nga mitabon.

Sa Dakbayan sa Naga sa wa pa motabon ang yuta gireklamo na sa mga nagpuyo duol sa dapit nahitaboan ang dagkong liki nga ilang nakita sa yuta apan ang Mines and Geosciences Bureau o MGB-7 miingon sa ilang suwat nga gipaabot ngadto kang Mayor Kristine Vanesa Chiong sa Naga nga adunay petsa Agosto 29, 2018 ang nangliki nga yuta wala kini maghatag og hulga sa mga tawo nga namuyo sa dapit.

Sa Itogon, Benguet, ang dapit nga dili na dapat papuy-an kay pulos na lungag ang ilawom sa yuta tungod sa pagmina apan gipuy-an gihapon kini sa mga tawo nga mahiligon sa risgo, resulta, daghan ang patay kay natabonan.

Kining tanan bunga sa pagpabaya sa otoridad sa ilang trabaho ug mga tawo nga mahiligon sa risgo. Bunga usab kining maong hitabo sa pag-abuso sa gobiyerno ug tawo sa kalikopan.

Abi ko ba og ang mga tawo nakat-on na og leksiyon sa nahitabo sa Guinsaugon sa Southern, Leyte nga hapit usa ka barangay ang gitabonan sa midahili nga yuta sa bukid, wa man diay gihapon.

Unsa na pud kaha ang atong mapaabot sa umaabot tungod sa padayon nga pagpabaya ug pag-abuso sa kalikopan? Ato na lang kining atngan.