EDITORYAL - Negosyong makadaot sa uban Edwin Ian Melecio
(Banat) - September 23, 2018 - 12:00am

Gipahunong na ang tanang matang sa pagpangubkob o quarrying sa tibuok probinsya sa Sugbo alang sa kasigurohan sa katawhan ilabi na niadtong mga komunidad duol sa mga lugar nga adunay nangubkob.

Dako ang kwarta gikan sa quarry operations kay ang makubkob nga mga minerales sama sa anapog, mga yuta ug mga bato gamiton mang materyales sa nagkadaghang gipangtukod nga mga buildings, karsada, reclamation areas ug uban pa.

Ang kalamboan matud pa dili makab-ot kon walay pagsakripisyo. Sa nahitabong mga pagdahili sa yuta dinhi sa nasud, nasakripisyo gyud tinuod ang kinabuhi sa mga natabunan. Nasakripisyo usab ang kinaiyahan tungod sa nangaupaw nga kabukiran.

Ang nasudnong kagamhanan pagkakita sa kadaot nga gibilin niining mga pagdahili sa kabukiran ngadto sa mga tawo, mipahunong og kadiyot sa tanang quarry ug mining operations sa pipila ka mga rehiyon apil niini ang Central Visayas.

Gusto nilang masayran kon luwas ba gyud ug dili peligro sa katawhan ang ilang mga operasyon. Apil sa gihimo mao ang pag-ilis gyud gani sa pipila ka mga opisyales sa mga hingtungdang ahensya sa gobiyerno nga gitahasan untang maoy motutok niini apan napakyas.

Giilisan sila ug gipaubos sa imbestigasyon, apan bisan pa man og masilotan kining mga opisyala uwahi na ang tanan.

Kaning temporaryong pagpahunong sa quarry operations ug paghimo og inspeksyon ug pagpa-imbestigar sa mga opisyales usa lang ka pamaagi sa gobiyerno aron ipakitang duna silay gihimo.

Uwahi na para sa mga nabiktima. Uwahi na para sa mga taga Tinaan, sa Dakbayan sa Naga nga diin daghan ang mga nangamatay ug nangaangol human natabunan sa anapog gikan sa quarry site sa usa ka dakong kompanya sa semento.

Bugtong solusyon niini walay lain kondili ang pagpahunong sa hingpit niining makadaot ug peligrosong industriya sa pagpangubkob. Gawas nga pipila lamang ka indibidwal ang nabulahan, daghang kinabuhi ang naa kanunay sa peligro tungod sa ilang negosyo.

EDITORYAL
Philstar
  • Latest
Latest
Latest
Recommended
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with